Сербия снайпера, РФ Сэбилэниилээх Күүстэрин баҕа өттүнэн кыттааччыта, Донбастааҕы байыаннай дьайыылар кыттыылааҕа Деян Берич саха ытааччыларын олус үчүгэй уонна бэлэмнээх диэн ааттаата. Бу туһунан кини Дьокуускайга ыытыллыбыт «Хотугу кирбии» эрэгийиэннээҕи форум кэмигэр ТАСС-ка иһитиннэрдэ.
«Мин кинилэри (Саха сирин снайпердарын — ТАСС.) кытта көрсүбүтүм. Бастакы көрсүһүү 2014 сыллаахха манна баҕа өттүнэн кэлбиттэри кытта буолбута. <…> Онтон 2015-с, 2016-с сылларга кэлэллэрэ, элбэхтэр этэ. Хайдах сыаналыыбыный? Олох үчүгэй, бэлэмнээх уолаттар», — диэтэ кини.
Кини этиитинэн, кини билэр дьоно идэтийбит байыаннайдар буолбатахтар этилэр. «Саха киһитэ оннук генетическайдык оҥоһуулаах быһыылаах — үчүгэй булчут буоларга. Снайпер сэриигэ — булчут, атыннык хайдах да сатаммат», — диэн кэпсэтээччи ааҕыныстыбаҕа эттэ.
Деян Берич — Донбаһы көмүскүүргэ кэлбит бастакы омук баҕа өттүнэн кэлбиттэртэн биирдэстэрэ. Кини 1990-с сылларга Югославия иирсээнин көрсүбүтэ, оттон 1999 сыллаахха НАТО бомбалааһынын тулуйбута. 2023 сыллаахха Берич Марьинка оройуонугар (ДНР) ыараханнык бааһырбыта, ол эрээри кини билигин да Арассыыйа уонна Сербия буойуттарыгар РФ Сэбилэниилээх Күүстэригэр көмөлөһөр.
