Саха сиригэр үс күн устата Госдуумаҕа, Ил Түмэҥҥэ эбии быыбардар буоллулар. Маны сэргэ 76 муниципальнай хампаанньалар ыытылыннылар. Икки улуус баһылыга, түөрт оройуон сэбиэтин депутаттара, 37 нэһилиэк баһылыга талылыннылар. Быыбардар тэрээһиннэрин таһыма үрдүктүк ааста, брифинг кэмигэр киин хамыыһыйа бэрэссэдээтэлэ Евгений Федоров эттэ.
«Үс таһымнаах быыбардары 822 быыбардыыр хамыыһыйа хааччыйда. Дааннайдар быыбар легитимнайын, аһаҕастык уонна сытыытык барбытын көрдөрдүлэр. Быыбардааччы быраабын туһанарыгар хааччахтыыр кэһиилэр оҥоһуллубатылар», — диэтэ Евгений Федоров.
Кини иһитиннэрбитинэн, кандидааттартан уонна паартыйалартан хас да үҥсүү киирдэ. Ол сотору кэминэн көрүллэрэ этилиннэ.
Биир мандааттаах уокурукка КПРФ бэрэстэбиитэлэ Петр Аммосов 69 215 быыбардааччы куолаһын ылла (21,61%) , Петр Черкашин «Единая Россия» баартыйа 64 275 куолас (20,07%), сиэрдээхтэр баартыйаларыттан Федот Тумусов — 62 597 (19,55%).
Баартыйаларга КПРФ — 118 683 куолас (35,15%), «Единая Россия» баартыйа — 112 160 (33,22%), «Новые люди» баартыйа — 33 318 (9,87%).
Быыбардааччы кыттыыта 51,23% тэҥ (2016 сыллааҕы маннык таһымнаах быыбары кытта тэҥнээтэххэ 3% үрдүк). Элбэх быыбардааччы Анаабыр, Өлөөн, Үөһээ Бүлүү улуустарыгар кытынна. Саха сирэ Уһук Илиҥҥи уокурукка үһүс миэстэҕэ турар, Еврейскай АУо уонна Чукотка кэннэ.
