Үөрэх бырагырааматыгар «Этнопродленка», тыл куурустара, «мастер-ученик» практика, билингвальнай кинигэ оҥорооһуна, «Язык как элемент творческой деятельности» бырайыак тэрээһиннэрэ киирэллэр. Көҕүлээһиннэр култуура уонна үөрэх тэрилтэлэрин, уопсастыбаннай тэрилтэлэри кытта ыытыллаллар. Дьаһал Ил Дархан иһинэн үлэлиир тыл сайдыытыгар Сүбэ быһаарыытынан барар.
Таатта улууһун Баайаҕатыгар тимир ууһугар уһуйар «Мандар кыһата», Сунтаар улууһугар «Айыы кыһата» национальнай гимназия «Мир олонхо» этнотуристическай экспедицията, «Сосновый бор» оҕо киинин «Күн Оһуохайа» телевизионнай биэриитин курдук лааҕырдары киэҥник сырдатыы үлэтэ барыаҕа. Маны сэргэ история миэстэлэринэн экспедициялар, спорт национальнай көрүҥнэригэр күрэхтэһиилэр, остуол оонньуулара, айар куонкурустар тэриллиэхтэрэ.
