Айсен Николаев Саха сирин баһылыгын иһинэн олохтоох салайыныыга сэбиэт мунньаҕын ыытта. Ол туһунан иһитиннэрэр sakha.gov.ru.
Мунньахха регион иннигэр турар тутаах боппуруостар, ол иһигэр АБДь кыттыылаахтарын үлэнэн хааччыйыы көрүлүннэ. Ил Дархан байыастар эйэлээх олоххо адаптациялара улахан суолталаах приоритет буоларын санатта.
«Ханнык да формализм суох буолуохтаах. Анал байыаннай дьайыы бэтэрээннэрэ төһө түргэнник үлэлээн-хамсаан, салгыы идэлэрин тупсарар кыахтаахтарын туһугар бары үлэни биэрээччилэри кытта көхтөөхтүк үлэлэһиэхтээхпит. Ону тэҥэ АБДь кыттыылаахтарын, кинилэр дьиэ кэргэттэрин чилиэннэрин кэлимник араҥаччылааһыны олохтуохха наада, кинилэр өйөбүл бары дьаһалларын туһаналларыгар уонна наадалаах көмөнү суһаллык ылалларыгар. Хас биирдиилэригэр тус-туспа сыһыаннаһыахха наада. Ол киһитийиини, көмөлөһөргө баҕалаах буолууну эрэйэр. Мин эһигиттэн барыгытыттан АБДь бэтэрээннэрин эйэлээх олохторугар төннүү биһиги эбээһинэспит эрэ буолбатаҕын, төрөөбүт дойдубут бары көмүскээччилэрин иннигэр уопсай иэспитин олус чуолкайдык өйдүүргүтүгэр көрдөһөбүн», – диэтэ Айсен Николаев.
Өрөспүүбүлүкэ баһылыга кыттааччылар болҕомтолорун ойуур баһаарыгар быһыыга-майгыга уурда.
«Баһаар ахсаана былырыыҥҥытааҕар быдан кыра да буоллар, быһыы-майгы соччо судургу буолбатах. Үөскүүр баһаардары суһаллык умуруорарга бары сыраны ууруохха наада», — диэн Айсен Николаев соругу туруорда.
Мунньахха үһүс боппуруоһунан биир кэлим куоластааһын күнүн ыытыыга бэлэмнэнии көрүлүннэ. Сыл сүрүн политическай түгэнинэн быйыл балаҕан ыйын 20 күнүгэр буолар Судаарыстыбаннай Дуумаҕа быыбар буолуоҕа.
«Бары баһылыктар быыбары тэрийиигэ эппиэтинэстэрин өйдүүллэр диэн эрэнэбин. Ситэриилээх былаас органнара да, олохтоох салайыныы органнара да саамай көхтөөхтүк кыттыыны ыларгыт наада. Быыбардыыр учаастактарга террористическай уонна баһаартан сэрэхтээх буолууну, хомунаалынай систиэмэ, тырааныспар, сибээс уонна энергиянан хааччыйыы тохтоло суох үлэлиирин быһаарыахха наада. Быыбар хамыыһыйалара быыбары үрдүк таһымҥа тэрийэллэригэр бары наадалааҕынан хааччыйыахха наада», — диэн баһылыктарга Айсен Николаев тыл эттэ.
