Балаҕан ыйын 8 күнүгэр, субуотаҕа, «Үс Хатыҥҥа» юкагирдар национальнай бырааһынньыктара — «Шахадьибэ» ыытыллыаҕа. Тэрээһин туһунан А.Е. Кулаковскай аатынан Норуоттар доҕордоһууларын дьиэтэ иһитиннэрэр.
Дьоро күн «Хотугу дьэргэлгэн» 18 №-дээх былаһааккаҕа 11:00 чаастан саҕаланыаҕа.
Бырааһынньыгы уоту аһатыы сиэрэ-туома арыйыаҕа, ол кэнниттэн «Лондол» уонна «Лоҕохонуйли» төгүрүччү туран үҥкүүлэр буолуохтара, ону тэҥэ «Былык миинэ-2026» куоҥкурус ыытыллыаҕа. Юкагир оонньуулара уонна успуорт көрүҥнэрэ, ол иһигэр юкагир многоборьета көрдөрүллүөҕэ. Маны сэргэ национальнай бүлүүдэлэр куонкурустара тэриллиэҕэ, бырааһынньык ыалдьыттарын хотугу ас арааһынан күндүлүөхтэрэ.
Бу бырааһынньык Арассыыйа норуоттарын сомоҕолоһуутун, Саха сиригэр Култуура сылын уонна Хотугу норуоттартан бастакы учуонай, юкагир литературатын төрүттээччи уонна уопсастыбаннай диэйэтэл Николай Спиридонов – Тэки Одулок төрөөбүтэ 120 сылыгар ананар.
Саха сирин юкагирдарын ассоциацията үгэстэри харыстааччылары, фольклор кэлэктииптэрин, норуот айымньытын маастардарын уонна юкагир култууратыгар интэриэстээх дьону барыларын бырааһынньыкка ыҥырар.
