Саха Өрөспүүбүүкэтигэр олохтоох бэйэни салайыныы уорганнара үс нэһилиэнньэлээх пуун сөтүөлүүр сирин бигэргэттилэр: Дьокуускай куоракка, Бүлүү улууһун Бүлүү куоратыгар уонна Мэҥэ Хаҥалас улууһун Аллараа Бэстээх бөһүөлэгэр. Ити туһунан Роспотребнадзор телеграмыгар суруллар.
Быйыл сайын сөтүөлүүр сирдэри (пляж) ууттан уонна кумахтан ылыллыбыт анаалыс түмүгэр олоҕуран, санитарнай-эпидемиологическай түмүк биллибитин кэннэ аһар былааннанар.
СӨ Роспотребнадзор управлениета сыллата уу уонна сир хаачыстыбатыгар санитарнай-гигиеническэй кэтээн көрүүнү ыытар.
Быйыл II категориялаах уу түөлбэлэриттэн санитарнай-химическэй, микробиологическай, паразитологическай уонна вирусологическай чинчийиигэ 200 кэриҥэ уу боруобатын, микробиологическай уонна паразитологическай көрдөрүүгэ кумах уонна сир 40 боруобатын ылара былааннанар.
Өрөспүүбүлүкэҕэ сөтүөлүүр кэм сыллата от ыйыттан саҕаланар, ол эрээри, быйыл ураты сылаас күн-дьыл туран, куорат 202-с түөлбэтиттэн уу боруобатын бэс ыйын 3 күнүгэр ылбыттар, суруйда Саха сирэ саайт.
