Саха сиригэр «Хас биирдии оскуолаҕа спорт легендата» диэн өрөспүүбүлүкэтээҕи акция үлэтин саҕалаата. Ол туһунан регион спорка миниистирэ Леонид Спиридонов тустуук, олимпийскай чемпион Роман Дмитриев дойдутугар Эдьигээҥҥэ сылдьан эттэ.
Миниистир олохтоох оскуолаҕа Монреалга олимпийскай оонньуулар чемпионнара Павел Пинигин, үрүҥ көмүс призер Александр Иванов, Мюнхеҥҥа тустууга олимпийскай чемпион, Монреалга олимпиада үрүҥ көмүс призера Роман Дмитриев уонна легендарнай тренер Дмитрий Коркин мэтириэттэрин туттарда.
«Эдьигээн легендарнай спортсменнарбыт ааттарын үйэтитиигэ уонна идеаллары, сыаннастарын олоххо киллэриигэ анаммыт үтүө миссияны саҕалааччы буолбутунан үөрэбин уонна киэн туттабын. Оҕолор кыра эрдэхтэриттэн уһулуччулаах биир дойдулаахтарын историятын билэр буоллахтарына, кинилэр тустууга эрэ буолбакка, олоххо эмиэ кыайыылаах буолаллар», — диир Леонид Спиридонов.
Роман Дмитриев Мюнхеннааҕы ХХ Олимпийскай оонньууларга кыттыыта 50 сылын чэрчитинэн, миниистир Эдьигээҥҥэ кэлэ сылдьыытын биэдэмистибэ пресс-сулууспатыгар чуолкайдаатылар. Кини бөһүөлэк баһылыга Степан Портнягиҥҥа 100 тыһыынча солкуобайдаах спортивнай инвентары атыылаһарга сертификаты, махтал суруктары туттарда, Роман Михайлович бюһугар сибэкки дьөрбөтүн уурда, спортивнай оскуола иитиллээччилэрин кытта көрүстэ.
Миниистир аатырбыт спортсмен 75 сааһыгар Эдьигээҥҥэ саҥа спортивнай саала тутулларын уонна кини олоҕун туһунан художественнай киинэ уһуллар былааннааҕын кэпсээтэ.
