Саха сиригэр анал байыаннай дьайыы (АБДь) кыттыылаахтарыгар уонна кинилэр дьиэ кэргэттэригэр босхо сир учаастактарын биэрии бырагыраамата олоххо киирэ турар. Бүгүҥҥү күҥҥэ 1354 сир учаастага үллэһилиннэ. Олортон 1126 учаастагы АБДь кыттыылаахтара, оттон 228 учаастагы кинилэр дьиэ кэргэттэрэ ыллылар диэн Саха сирин баайга-дуолга уонна сир сыһыаннаһыыларыгар министиэристибэтэ иһитиннэрэр.
«Анал байыаннай дьайыы кыттыылаахтарыгар сир учаастактарын босхо биэрии — бу олох усулуобуйатын тупсарыы эрэ буолбатах, дойдуларыгар сулууспалыыр дьоҥҥо ытыктабыл бэлиэтэ», — диэн Арассыыйа Дьоруойа Александр Колесов тоһоҕолоон бэлиэтээтэ.
Өрөспүүбүлүкэ геоплатформатын уонна олохтоох салайыныы уорганнарын дааннайдарынан, сир учаастагын ылыыга уочаракка 3573 киһи турар. Олортон 2956-та — АБДь кыттыылаахтара, хаалбыт 617 киһи — кинилэр дьиэ кэргэттэрэ.
АБДь кыттыылаахтарын сир учаастактарынан хааччыйар туһугар Саха сирин олохтоох салайыныылара уопсайа 98,6 гектар иэннээх 1259 учаастагы тэрийбиттэрин өрөспүүбүлүкэ Баайга-дуолга уонна сир сыһыаннаһыыларыгар министиэристибэтэ бэлиэтиир.
