Саха сирэ үөрэх хаачыстыбатыгар улахан болҕомтотун уурар, бу хайысхаҕа биллэр ситиһиилэннэ. Бу туһунан Саха сирин баһылыга Айсен Николаев 2025 сыллаахха судаарыстыбаннай былаас толорор уорганнарын үлэлэрин түмүгүн туһунан Ил Түмэҥҥэ отчуот кэмигэр эттэ.
«2025 сыллаахха судаарыстыбаннай түмүктүүр аттестация түмүгүнэн өрөспүүбүлүкэ дойдуга 21-с миэстэни ылла, икки сыл иһигэр бэйэтин балаһыанньатын 47 пуунунан тупсарда. Биир кэлим эксээмэн (БКЭ) түмүгүнэн эмиэ тупсуулар бааллар. 2025 сылга Арассыыйатааҕы олимпиадалар финалыгар 15 сыл устата муҥутуур үчүгэй көрдөрүү ситиһилиннэ. Биһиги экономикаҕа профессиональнай каадырдары бэлэмнээһиҥҥэ күүспүтүн-кыахпытын өссө күүскэ уурабыт», — диэтэ кини.
Айсен Николаев эппитинэн, бырабыыталыстыба сэттэ сыллаах каадыры бэлэмнээһин борогунуоһун оҥорор. Үлэ ырыынагар саамай наадалаах идэлэри бырагыраамалары уларытар сыалтан чопчулууллар. Орто профессиональнай үөрэх систиэмэтигэр 215 идэҕэ 24 500 устудьуон үөрэнэр.
«Биһиги «Профессионалитет» федеральнай бырайыак күрэхтэригэр кыайыылаах регионнар ахсааннарыгар киирэбит. Бүтэһик күрэх түмүгүнэн, 1 миллиард солкуобай информационнай технологияларга, тутууга, тырааныспарка, оттук-энергетика комплексыгар, электротехникаҕа, туризмҥа уонна чэпчэки промышленность салааларыгар саҥа сэттэ үөрэх кластердарын тэрийиигэ ыытыллыаҕа», — диэтэ Ил Дархан.
Санаттахха, Саха сирин баһылыга Айсен Николаев өрөспүүбүлүкэ уопсай үөрэх хаачыстыбатынан Арассыыйа бастыҥ 15 регионун ахсааныгар киирэрин сорук туруорар. Кини бэлиитикэтин сүрүн приоритеттерынан педагогтары өйөөһүн, идэ аатын-суолун үрдэтии уонна оҕолорго олорор сирдэриттэн тутулуга суох үрдүк таһымнаах үөрэҕи хааччыйыы буолар.
