18 От ыйа 18.07
  • 18°
  • $ 88,09
  • 96,3

Өрөспүүбүлүкэ бүттүүнэ барыллаан куоластааһыҥҥа кыттар

13:48, 22 мая 2016
Текст:
Читайте нас на
Яндекс Новости
ЯДВ

Саха сирин үрдүнэн «Биир ньыгыл Россия» партия ыытар барыллаан куоластааһына олус көхтөөхтүк баран иһэрин СИА улуустардааҕы уопсастыбаннай кэрэспэдьиэннэрэ тиһигин быстапакка иһитиннэрэллэр. Олохтоохтор бу олус эппиэттээх тэрээһин буоларын билинэн, сарсыардаттан учаастактарга тоҕуоруспуттар. 


Дьокуускай бириэмэтинэн Абыйга 9 ч. 15 мүнүүтэҕэ 238 киһи куоластаата, Черскэйгэ күнүс 1 чааска 127 киһи бэйэтин гражданскай быраабын туһанна, Муомаҕа 9 чааска 189 киһи.

ДЬААҤЫГА

Күнүс 12 чааска Баатаҕайга уонна Дьааҥы куоратыгар 540 киһи быыбардыыр учаастактарга кэлэ сырытта. “Ньукуолун күнүнэн сибээстээн, тэрийээччилэр эбиэт кэннэ дьон өссө элбиэҕэ дииллэр. Эбиэт кэмигэр дьааҥылар эбэлэригэр мустан сиэр-туом ыыталлар», — диэн кэпсээтэ Майя Горохова.

ГОРНАЙГА

Оттон Горнайга сарсыарда 10 чааска икки учаастагынан 170 киһи быыбардаабыт. Атыы-тутуу, оҕо сынньалаҥа тэриллибит. “Ордук рассада атыыта, хара буор хамаҕатык барар. Бүгүн тэрийээччилэр 1500 киһи куоластыа диэн эрэл санаалаахтар», — диир Василий Алексеев.

МЭҤЭ ХАҤАЛАСКА

Барыллаан куоластааһын Майа сэлиэнньэтигэр олус тэрээһиннээхтик ыытыллар, дьон-сэргэ көхтөөхтүк кыттар. Сарсыарда 8 чаастан Дм.Ф. Ходулов аатынан норуот айымньытын киинин таһыттан сахалыы тыыннаах муусука ньиргийдэ. Быыбардааччылар куоластаан баран Аркадий Новиков көрдөөх киинэлэрин көрөллөр, минньигэс астаах буфет үлэлиир.
Сарсыарда Майаҕа 11 ч 30 мүн 600 киһи кытынна. 11 ч көрдөрүүнэн Аллараа Бэстээххэ 165, Нөөрүктээйигэ 379, Хаптаҕайга 190 киһи куоластаата. Бу туһунан Майаттан Алена Докторова кэпсээтэ.

ОРТО ХАЛЫМАҔА

Орто Халыма куоракка барыллаан куоластааһын улуус дьаһалтатыгар уонна «Кулума» култуурунай сынньалаҥ кииҥҥэ ыытылла турар.
Манна тэрилтэлэринэн дьаарбаҥка тэриллэр. Валентина Созонова: “Быыбарга көхтөөхтүк кыттабын. Бүгүн халлаан тымныы буолан куоластааччы ахсаана аҕыйах буолуо диэн куттанабын эрээри, кэлиэхтэрэ диэн эрэнэбин. Кинигэ атыыта, хаартыскаҕа түһэрии тэриллибитэ наһаа бэрт. Учуутал киһи буолан үлэбэр туһанаары хас да кинигэ атыыластым. Итиэннэ империатрица уобараһыгар хаартыска оҥотторон астынным», — диэн санаатын үллэһиннэ.
Куоракка инчэҕэй хаар түһэ турар, күүстээх тыаллаах.
Третьяков Георгий уонна Мышакин Максим 18 саастарын туолан аан бастаан куоластааһыҥҥа кыттан, сүргэлэрэ көтөҕүллүбүт. Кинилэргэ улуус дьаһалтатын баһылыгын сертификата туттарылынна.
Эбиэт кэминээҕи дааннайынан улууска 543 киһи куоластаабыта билиннэ», — диэн Римма Ноговицына кэпсээтэ.

УУС АЛДАҤҤА

Уус Алдан улууһун Лөгөй нэһилиэгэр барыллаан куоластааһын, дойдуга бүттүүнүгэр курдук, сарсыарда 8 чаастан саҕаланна. Нэһилиэк киинигэр Кэптэнигэ сынньалаҥ дьиэтигэр тэриллибит быыбардыыр учаастакка кэптэнилэртэн ураты Хомустаах, Даалы учаастактара, Баатаҕай уонна I Өспөх нэһилиэктэрин олохтоохторо эмиэ куоластыыллар.
Быыбардыыр хамыыһыйа председателэ Мария Андросова этэринэн, дьон кыттыыта көхтөөх. «Сарсыарда 10 чааска 21 киһи куоластаабыта регистрацияламмыт буоллаҕына, күнүс 11 чааска номнуо 116 киһи куоластаата. Өссө да дьон кэлэ турар», — диэн иһитиннэрдэ. Бу туһунан Диана Седалищева биллэрдэ.

ҮӨҺЭЭ БҮЛҮҮГЭ

Үөһээ Бүлүү улууһугар Ньукуолун күнүгэр сарсыардаттан дьон алаадьылаан, ол кэннэ бары биир киһи курдук праймеризка таҕыстылар. Үөһээ Бүлүү киинигэр 1 учаастак, Үөдүгэй сэлиэнньэтигэр 1 учаастак арыллан үлэлии тураллар. Биһиги икки ыал буолан Үөдүгэйдээҕи сынньалаҥ киинигэр куоласпытын биэрдибит.
ОДьКХ саалатыгар сарсыардаттан рассада атыыта күргүөмнээхтик ыытылла турар. Оттон “Иэйии” сынньалаҥ киинигэр эбиэт кэннэ алаадьы бырааһынньыга ыытыллар.
М.Т. Егоров аатынан оскуола директорын үөрэх чааһыгар солбуйааччы Леонид Огочонов: “Биһиги кэргэмминээн, оҕобутунаан сарсыарда эрдэ туран, бэлэмнэнэн баран праймеризка кэлэн куоласпытын биэрдибит. Хас биирдии киһи Саха Сирэ туруктаах, байылыат олохтоох, уйгулаах буоларын туһугар куоластыырбыт ытык иэспит буолар», — диэтэ диэн Мария Васильева кэпсээтэ.

САНГААРГА

Сангаарга сарсыарда 8 чаастан биэс быыбардыыр учаастагынан куоластааһын бара турар. Ордук элбэх киһи “Шахтердааҕы”, “Геологтааҕы”, “Первомайдааҕы” быыбардыыр учаастакка кэлбиттэрэ көстөр. Сангаар бөһүөлэгэр күнүс 12.00 чаас туругунан 505 киһи куоластаабыт.

“Шахтердааҕы” учаастакка быыбардааччы Агафья Эверстова этэринэн, кини сылдьыбыт учаастагар дьон элбэх эбит. “Быыбар туох да мэһэйэ суох бара турар, дьон кэлбит буолан кыратык уочаракка туран ыллым, тус бэйэм Госдума депутатыгар барыллаан куоластааһыҥҥа кыттар түөрт кандидакка куоласпын тэҥинэн биэрдим. Эрэнэн талар буоллахпыт», — диэтэ кини. Бу туһунан Виктор Эверстов кэпсээтэ.

Следите за самым важным и интересным в Telegram-канале и WhatsApp-группе ЯСИА