19 От ыйа 19.07
  • 16°
  • $ 87,88
  • 96,1

Павел Пинигин: Россия чемпионатыгар сатыыргытын уонна онтон ордугу көрдөрүҥ!

15:36, 16 мая 2016
Читайте нас на
Яндекс Новости
ЯДВ

Көҥүл тустууга Саха сирин сүүмэрдэммит хамаандатын кытта Саха сирин баһылыга Егор Борисов көрсүһүүтүгэр 1976 сыллаахха Монреаллааҕы Олимпиада кыайыылааҕа Павел Пинигин буолаары турар Россия чемпионатыгар тустууктары алҕаата. Бу күрэхтэһиигэ саха тустууктара Россия чулуу спортсменнарын кытта кыһыл көмүс мэтээл уонна Рио-де-Жанейроҕа ыытыллар Олимпиадаҕа путевка иһин күөн көрсүөхтэрэ.


«Россия чемпионата быйыл Олимпиада буолар сылыгар биһиги дойдубутугар ыытыллар. Эһиги уонна ыалдьааччылар тустарыгар маннык быһаарыы ылыллыбыта. Аны эһиги, биһиги туспутугар туруулаһыҥ!», — диэтэ Павел Пинигин.

«Бүтүн Россия чемпионатыгар тугу сатыыргытын, кыайаргытын бүтүннүүтүн уонна онтон элбэҕи көрдөрүҥ! Оччоҕо Кыайыы биһиэнэ буолуоҕа!», — диэтэ кини.

«Эһиги бэйэҕит дойдугутугар, дьарыктанар сиргитигэр — спортивнай бэлэмнэнии киинигэр күрэхтэһиэххит. Онон, тустуу көбүөрүгэр бэйэҕитин хаһаайын быһыытынан көрдөрүҥ! Хас биирдиигит сатыырын, кыайарын таһынан оҥоруоҕа диэн бүк эрэнэбин!», — диэн кини эбэн эттэ.

«Аны 17-18 күнүнэн Кыайыылаах үрдүк аатын ылар туһугар бүтэһик сөкүүндэҕэ тиийэ дьулуурдаахтык киирсиҥ, тустуҥ!» — диэтэ Павел Пинигин.

Санатар буоллахха, көҥүл тустууга России чемпионата ыам ыйын 27-29 күннэригэр «Триумф» спортивнай кииҥҥэ ыытыллар. Кыайыылаахтар дойду чиэһин көмүскүү Рио-де-Жанейроҕа буолар Олимпиадаҕа барыахтара.

Следите за самым важным и интересным в Telegram-канале и WhatsApp-группе ЯСИА