Саха сирин тустууга, Румыния аатыттан киирсэр Николай Охлопков Римҥэ буолбут көҥүл тустууга Европа чемпионатын боруонса кыайыылааҕынан буолла. Онон эппиэтинэстээх стартка икки саха уола ситиһиилэннэ. Ньургун Скрябин субуотаҕа үрүҥ көмүс мэтээли туппута, диэн СИА иһитиннэрэр.
Николай Охлопков 61 кг диэри киирсибитэ. Бастакы эргииргэ аан дойду чемпиона Бек Ломтадзеҕа хотторор, ити эрээри боруонсаны былдьаһыыга киирсэр финалга тахсар хапсыһыыга молдованин Леонид Колеснигы 6:2 ахсааҥҥа кыайар.
Онон Николай боруонса наҕараада иһин Азербайджан бэрэстэбиитэлэ, былырыыҥҥы чемпионат призера Интигам Велизадэлиин киирэр. Саха тустууга утарсааччытын тушеҕа быраҕан, 3:1 баалы хомуйан, боруонса мэтээли ылар.
61 кг ыйааһыҥҥа кыайыылааҕынан Дьокуускайга ыытыллыбыт Дмитрий Коркин аатынан күрэхтэһии түөрт төгүллээх чемпиона Александр Богомоев (Бурятия) буолар, үрүҥ көмүс — аан дойду былырыыҥҥы чемпиона Бека Ломтадзе, өссө биир боруонса мэтээли армянин Арсен Арутюнян ылар.
