Оонньууларга наҕараадалары туттарыы тэрээһинигэр кэрэчээн кыргыттарбыт кэтэр сахалыы моһуоннаах анал ырбаахылара тигилиннэ. Бу улууспут бэлиэлэрин – Үрүҥ Дьөһөгөй оҕотун уонна Мүрү Эбэ күөх долгунун көстүүтүн хоһуйар, үрүҥ, күөх киллэһиктээх 7 ырбаахыны оҕону эбии үөрэхтээһин киинин уһуйааччыта иистэнньэҥ, тарбаҕар талааннаах Нюргуяна Семенова эскиистээн, саҥаһа, норуот маастара Саргылана Константиновалыын тиктилэр.
Бу ырбаахылар киэргэллэрэ барыта оҕуруонан тиһиллэн, тус-туспа уһуллан, атын көстүүмҥэ кэтэргэ сөптөөх гына тигиллибиттэр итиэннэ Мүрү Эбэ долгунун санатар уһуллар чэпчэки органза киллэһиктээх буолбуттар.
Нюргуяна Егоровна этэринэн, иистэнньэҥнэр улуустарыгар буола турар Оонньууларга дьон-сэргэ, ыалдьыттар тэрээһин үлэтиттэн дуоһуйан, үөрэн-көтөн баралларын туһугар кыһамньыларын, сатабылларын ууран үлэлээбиттэр.
Манна бэлиэтээн эттэххэ, улууспутугар 1996 сыллаахха ыытыллыбыт бастакы Спортивнай оонньууларга Нюргуяна Семенова ийэтэ норуот маастара, улуус киэн туттар иистэнньэҥэ Екатерина Ивановна Колодезникова Оонньуулар бэлиэлэрин – Кулуунчугу тигэн, үөрүүлээх сабыллыыга киэҥ халлааҥҥа көтүппүттэрин дьон-сэргэ өйдүүр. Онон утум салҕанар, Нюргуяна Семенова дьонун үтүө суолларын салҕаан, өйдөбүнньүк үлэлэри оҥордо.
Екатерина Захарова
