От ыйын 31 күнүгэр Павел Пинигин, Роман Дмитриев, Александр Иванов Монреаллааҕы Олимпиадаҕа өрөгөйдөөбүттэрэ 45 сыла буолар. 1976 сыллаахха саха бөҕөстөрө биир кыһыл көмүс, икки үрүҥ көмүс мэтээли ылары ситиспиттэрэ. Манан сибээстээн кэккэ тэрээһиннэр буолуохтара диэн, СИА спорт министиэристибэтигэр сигэнэн суруйар.
Спорт миниистирин бастакы солбуйааччы Леонид Спиридонов «от ыйын 31 күнүгэр «Саха» НКИХ ханаалыгар Павел Пинигин, Александр Иванов кыттыылаах эфир буолуо, документальнай устуулар көстүөхтэрэ, Саха сирин тустууга сүүмэрдэммит хамаандата флэшмоб көрдөрүө» диэтэ. Дьокуускай куорат уулуссаҕа турар экраннарыгар Олимпиада кыайыылаахтарыгар анаммыт видеороликтары көрдөрүөхтэрэ.
«Итини таһынан, балаҕан ыйын 5 күнүгэр, аатырбыт тренер Дмитрий Коркин төрөөбүт күнүгэр сөп түбэһиннэрэн, хас биирдии спортивнай оскуолаҕа олимпийскай Албан аат стендатын ыйыахпыт. Оскуола иитиллээччилэрэ кыра эрдэхтэриттэн дойдуларын ааттаахтарын билэ улааталларын курдук», — диэтэ Леонид Спиридонов.
Сүрүн тэрээһининэн алтынньы 12-14 күннэригэр ыытыллыахтаах Дмитрий Коркин кэриэһигэр тустууга норуоттар икки ардыларынааҕы турнир буолуо. Күрэхтэһиигэ биллиилээх тустууктар, бочуоттаах ыалдьыттар кэлэллэрэ күүтүллэр.
