22 От ыйа 22.07
  • 15°
  • $ 88,02
  • 96,04

Мииринэй уонна Өлөөн улуустарын кыраныыссатыгар овцебык сылдьара бэлиэтэннэ

11:28, 31 января 2020
Текст:
Читайте нас на
Яндекс Новости
ЯДВ

Мииринэй уонна Өлөөн улуустарын кыраныыссатыгар олохтоохтор овцебык сылдьарын көрдүлэр. Бу бүгүҥҥү күн туругунан сэдэх кыыл саамай соҕуруу бэлиэтэммит сирэ буолар. Бу туһунан өрөспүүбүлүкэтээҕи айылҕа саппаас баайын уонна ураты харыстанар сирдэрин дириэксийэтэ иһитиннэрэр.


«2020 сыл тохунньу 29 күнүгэр Саха сирин Мииринэй уонна Өлөөн улуустарын кыраныыссатыттан чугас атыыр овцебык сылдьара бэлиэтэннэ. Видеоҕа уонна хаартыскаҕа түһэрдилэр. Бүгүҥҥү күн туругунан, бу, сэдэх кыыл бэлиэтэммит саамай соҕуруу сирэ буолар. Овцебык ууһаан олорор сириттэн ыраах тэйиитэ кыыл чөл туруктааҕын уонна олохтоох нэһилиэнньэ үтүө санаалааҕын туоһута буолар», – диэн этиллэр.

Овцебыктары Саха сирин туундаратыгар ууһатыы бырагыраамата 1996 сыллаахха саҕаламмыта. Бу кэм устата Таймыр, Ямал уонна Анаабыр улууһун Улахан Бегичев арыытыттан уопсайа 11 төгүл овцебык тутуута оҥоһуллубута.

Булун, Анаабыр, Аллайыаха уонна Аллараа Халыма улуустарыгар 190 овцебык ыытыллыбыта. Кыыллар Абый, Эдьигээн, Өлөөн, Усуйаана, Эбээн Бытантай тыаларыгар тиийиилэрэ бэлиэтэммитэ.

Үөрдэриттэн үүрүллүбүт атыыр овцебыктар көхтөөхтүк тарҕаналлар. Бэйэлэрин тустарыгар олорорго сөптөөх, саҥа туһалаах сир разведчиктарынан буолаллара бу көрүҥҥэ бэлиэтэнэр көстүү.

Көрүҥ ахсаана уонна ууһаан сылдьар сирэ сыллата улаатан иһэр. Билиҥҥи туругунан ахсааннара түөрт тыһыынчаҕа тиийэн эрэр.

Овцебык өрөспүүбүлүкэ Кыһыл кинигэтигэр киирэр. Сокуоннайа суох бултааһын иһин РФ холуобунай кодексын тустаах ыстатыйатынан улахан кээмэйдээх ыстараап түһэриллэр эбэтэр көҥүл быһыллар, диэн суруйар НВК «Саха».

Следите за самым важным и интересным в Telegram-канале и WhatsApp-группе ЯСИА
Тутаах тыллар