29 Кулун тутар 29.03
  • -10°
  • $ 92,26
  • 99,71

Мэҥэ Хаҥаласка култуура уонна успуорт эстэпиэтэтин ыһыаҕар

16:14, 22 июня 2016
Текст:
Читайте нас на
Яндекс Новости
ЯДВ

Бэс ыйын 19 күнүгэр Ураһалаахха «В.К. Степанов аатынан Култуура уонна успуорт эстэпиэтэтэ» бэстибээл 60 сылыгар ананар улуустааҕы ыһыах ыытылынна.


Алгыс түһүлгэтигэр алгыстаныы, арчыланыы сиэрин-туомун толоруу кэнниттэн киин түһүлгэҕэ 31 нэһилиэк баһылыга, улууспутугар култуура уонна успуорт эстэпиэтэтин көхтөөх кыттааччылара, уопсастыбаннай түмсүүлэр чилиэннэрэ ытыс тыаһыгар, тыыннаах муусукаҕа доҕуһуоллатан хаамсан киирдилэр.

Ыһыах ытык-мааны ыҥырыылаах ыалдьыттарынан биир дойдулаахтарбыт СӨ Ил Түмэн дьокутааттара Юрий Баишев, Александр Романов, СӨ Гражданскай уопсастыбатын институттарын сайыннарыыга миниистирэ Сардаана Гурьева буоллулар.

Сардаана Гурьева мустубут дьоҥҥо туһаайан, дойдуга эҥкилэ суох бэриниилээх буолуу улахан суолталааҕын бэлиэтээн туран: «Россия Президенэ Владимир Путин этэрин курдук, арҕаа дойдулар биһиги дойдубутун кытта уустук сыһыаннаһыыларын кэмнэригэр патриоттуу санаалаах буоллахпытына эрэ сайдар кыахтаахпыт, сирбитигэр-уоппутугар, дьоммутугар-сэргэбитигэр тапталбытын бэйэбит үтүө суобастаах үлэбитиннэн-хамнаспытынан бигэргэтиэхтээхпит», ‒ диэтэ эттэ уонна СӨ Ил Дарханын аатыттан эҕэрдэ суругу аахта, улуус баһылыга Николай Старостиҥҥа Саха сирин туһунан өйдөбүнньүк кинигэни туттарда.

Салгыы миниистир «СӨ үөрэҕириигэ үтүөлээх үлэһитэ» үрдүк аат бэлиэтин Моорук оскуолатын эбии үөрэхтээһинин педагогар Аполлон Апросимовка, Ил Дархан Грамотатын Оройуоннааҕы киин балыыһа үлэһитигэр Ирина Бурнашеваҕа, «Гражданскай килбиэн» бэлиэлэрин улуустааҕы баһаары утары сулууспа этэрээтин началынньыгар Александр Куличкиҥҥа, Майатааҕы поликлиника сэбиэдиссэйигэр Татьяна Федороваҕа, «СӨ муниципальнай сулууспатын туйгуна» бэлиэлэри Хорообут нэһилиэгин дьаһалтатын исписэлииһигэр Раиса Михайловаҕа, Ороссолуода нэһилиэгин дьаһалтатын исписэлииһигэр Анна Филипповаҕа туттартаата.

Улуус баһылыга Николай Старостин дьон-сэргэ, ыччаттар, бэтэрээннэр саамай киэн туттар тэрээһиннэрэ ‒ култуура уонна успуорт эстэпиэтиэтин 60 сылыгар анаммыт өрөгөйдөөх ыһыаҕынан эҕэрдэтин тиэртэ. Кини «Азия оҕолорун» оонньууларыгар кыттаары бэлэмнэнэ сылдьар эдэркээн спортсменнарбытыгар, Бразилияҕа Рио-де-Жанейроҕа Олимпиадаҕа кыттыахтаах Василий Егоровпытыгар ситиһиилэри баҕарыаҕыҥ, кинилэр тустарыгар алгыспытын биир дойдулаахтары аныаҕыҥ диэн ыҥырда.

Николай Старостин уонна оройуон Сэбиэтин бэрэссэдээтэлэ Андрей Находкин улуус баһылыгын грамоталарын Аҕа дойду Улуу сэриитин кыттыылааҕар Николай Назаровка, улууска аудиовизуальнай нэһилиэстибэ салаатын кылаабынай исписэлииһигэр Иван Аргуновка, Хара спортивнай оскуолатын физкультураҕа учууталыгар, аан дойду кылаастаах успуорт маастарыгар Лариса Семеноваҕа, 30 тыһыынча солкуобай суумалаах сэртипикээттэри Россиятааҕы мас-рестлинг көрүҥэр чөмпүйүөн үрдүк ааттарын сүкпүт Анна Охлопковаҕа, Туйаара Орловаҕа, Игорь Дьяконовка, 20 тыһыынча солкуобайдаах сэртипикээти иккис миэстэлээх Сергей Черкашиҥҥа, 10 тыһыынчалаах сэртипикээттэри үһүс миэстэлээх Алина Турчинаҕа, Павел Кычкиҥҥа уонна тириэньэр Андрей Винокуровка туттардылар.

Үрүҥ тунах ыһыаҕынан Майа сэлиэнньэтин баһылыга Тимофей Нестеров эҕэрдэлээтэ уонна «Майа сэлиэнньэтин Бочуоттаах гражданина» ааттары ОДьКХ аварийнай-диспетчерскэй сулууспатын силиэсэрэ Егор Яковлевка, И.М.Сосин аатынан улуустааҕы киин бибилэтиэкэ сэбиэдиссэйэ Елизавета Корниловаҕа, оройуон Сэбиэтин дьокутаата Зиновий Игнатьевка, «Мегинострой» тутуу кээпэрэтиибин бэрэссэдээтэлэ Александр Тарасовка, РФ үтүөлээх учуутала, Майатааҕы лиссиэй интэринээтин иитээччитэ Анна Сергучеваҕа уонна үлэ бэтэрээнэ, коммунистическай үлэ удаарынньыга Петр Готовцевка иҥэриллибитин иһитиннэрэн дастабырыанньалары туттарда.

Ыһыах үөрүүлээх чааһын Майатааҕы народнай хор, М.К.Попова аатынан оҕо ускуустубатын оскуолатын аркыастыра тыыннаах муусуканан, «Кыталык» народнай ансаамбыл үҥкүүһүттэрэ киэргэттилэр. Дм.Ф.Ходулов аатынан норуот айымньытын киинин эдэр артыыстара туруорууларынан эстэпиэтэ 60 сыл тухары хайдах сайдан кэлбитин кэпсиир дьүһүйүүнэн саҕалаатылар. «Мэҥэлэр өрөгөй ырыаларын» Дмитрий Тихонов, эстэпиэтэттэн кынаттанан тахсыбыт биир дойдулаахпыт Аркадий Алексеев «Аан дойду ыччатын сүрэҕэ», «Төлөннөр» төлөннөөх ырыаларынан, саҥа тахсан эрэ сулус Терентий Егоров Анастасия Варламова репертуарыттан, эдэр хомусчут Эркин Алексеев бэртээхэй нүөмэрдэри бэлэхтээтилэр, өр сылларга култуура уонна успуорт эстэпиэтиэтин салайсан кэлбит бэтэрээннэри уруйдаатылар, кинилэр ааттарын санаан-ахтан аастылар.

Киин түһүлгэҕэ көрөөччүлэр Култуура уонна успуорт эстэпиэтэтин 60 сыллааҕы үбүлүөйдээх бэстибээлин кыайыылаахтарын, лауреаттарын кэнсиэрин дуоһуйа көрдүлэр. Бу күн Ураһалаахха оһуокай, ырыа-тойук, хомус тыаһа ыраахха диэри дьиэрэйдэ, сахалыы төрүт оонньууларга күрэхтэһиилэр ыытылыннылар, уран тарбахтаахтар, талбан талааннаахтар быыстапкалара туруорулуннулар, оонньуу-көр, атыы-тутуу оройуттан тутулунна.

Киэһэ Баһылай Манчаары аатынан стадиоҥҥа биир дойдулаахтарбыт, эстрада сулустара кыттыылаах Майаҕа култуура киинин тутууга аахсыйа кэнсиэр ыытылынна.

Следите за самым важным и интересным в Telegram-канале и WhatsApp-группе ЯСИА