Мэҥэ Хаҥалас улууһугар хаһыс да сылын ситиһиилээхтик бүтүн Арассыыйатааҕы «Хаарбах дьиэттэн көһөрүү» бырагыраамата үгүс нэһилиэктэри хабан үлэлиир. Бу туһунан улуус дьаһалтатын телеграм-ханаала суруйар.
Балаҕан ыйын 12 күнүгэр улуус баһылыгын тутууга солбуйааччы Василий Филиппов уонна тутуу салалататын салайааччыта Илья Григорьев II Наахара уонна II Тыыллыма нэһилиэктэригэр тахсан саҥа дьиэлэр тутууларын хаамыытын билистилэр.
II Наахара дьаһалтатын дьиэтигэр салайааччылар уонна нэһилиэк баһылыга Петр Никитин кыттыылаах улахан мунньахха дьон тоҕуоруһа муһунна. Көһөрүү бырагырааматынан сылын аайы ууга барар уонна хаарбах дьиэлээх дьон хабыллыбыттар.
Нэһилиэккэ үс этээстээх саҥа таас дьиэ быйыл балаҕан ыйын бүтүүтэ тутуллан бүтэн үлэҕэ киириэхтээх. Манна 23 ыал хаарбах туруктаах уопсай дьиэлэртэн көһөн киирэллэрэ күүтүллэр. Нэһилиэккэ бу бастакы таас мэндиэмэннээх дьон олорор дьиэтэ буолар. Онон олохтоохтор үөрүүлэрэ үгүс. Ону таһынан салайааччылар, сылын ахсын сааскы халаан уутугар барар дьону дьиэнэн хааччыйыы боппуруостарын сыныйан көрдүлэр. Олохтоохтор санааларын болҕойон иһиттилэр.
Сокуон быһыытынан сааскы халаан уутуттан эмсэҕэлиир дьоҥҥо харчынан компенсация көрүллэр. Тыа дьоно сүрүннээн хаһаайыстыбаларыттан, хотонноруттан арахсыбат санааттан олорор сирдэригэр үрдэл куттаран саҥа дьиэ туттар кыаҕы, биитэр нэһилиэк иһинэн үрдүк сирдэргэ саҥа учаастак ылан саҥа дьиэ туттуутун ыйыттылар. Салайааччылар сокуон иһинэн туох ирдэбил турарын, ханнык суол-иис тобуллуон сөбүн дьоҥҥо-сэргэҕэ сиһилии сүбэ-ама биэрдилэр.
Салгыы оробуочай бөлөх II Тыыллыма нэһилиэгэр тахсан саҥа 8 квартиралаах 2 этээстээх таас дьиэ тутуутун көрдө-иһиттэ, билистэ. Саас-сааһынан сааһылынанан, былааннаммыт кэминэн лоп-бааччы барыта олоххо киирэн нэһилиэктэрбит олохтоохторо саҥа дьиэ-уот ылан үөрүүлэрэ үксүө.
Мэҥэ Хаҥалас улууһун дьаһалтатын пресс-сулууспата
