История, түмүктэр, ситиһиилэр, спортсменнар ааттара, трансляциялар — бу барыта «Игры Манчаары» официальнай сайтыгар тиһиллиэҕэ. Портал Горнай улууһугар эрэ ыытыллар спартакиадаҕа буолбакка, кэлэр оонньууларга эмиэ үлэлиэҕэ. «Сахамедиа» медиа-кииҥҥэ спорт министиэристибэтэ сайт үлэтигэр старт биллэрдэ, суруйар СИА.
«Манчаары Оонньууларын сайдыытыгар саҥа страницаны арыйабыт. Спартакиадаҕа диэри 15 хонук хаалла, олох чугаһаата. Хас биирдии муниципальнай оройуон бу күрэхтэһиилэри бэйэтигэр ыытыан баҕарар. Тэрээһин улууска саҥа спортивнай эбийиэктэри тутар уонна социальнай-бытовой боппуруостары быһаарар, бастатан туран, суол, нэһилиэнньэ доруобуйата, физкультура уонна спорт сайдыыта», — диэтэ спорт миниистирэ Иннокентий Григорьев.
Кини бэлиэтээбитинэн, Горнай улууһа Спартакиаданы ыытыыга бэлэм. «Спорт — норма жизни» национальнай бырайыак чэрчитинэн ыытыллар дьаһал элбэҕи оҥордо.
Старды миниистир Иннокентий Григорьев уонна саха спордун аксакала Афанасий Алексеев оҥордулар.
Сайты кытта бу сигэнэн билсиэххэ сөп.
