Тыа хаһаайыстыбатын, ас-үөл политикатын министиэристибэтигэр федеральнай граҥҥа тиксиэн баҕалаах үлэлэрин саҥа саҕалыыр фермердэри сүүмэрдээһин саҕаланна. Куонкуруска 380 бырайыак кыттар.
Кулун тутар 28 күнүттэн муус устар 22 күнүгэр диэри куонкуруска докумуону хомуйбуттара. Граҥҥа тиксиэн баҕалаах дьон ахсаана сыл аайы элбии турар. Өрөспүүбүлүкэ 29 улууһуттан уопсайа 418 сайаапка киирбитэ. Итинтэн 38-гар хамыыһыйа аккаастаабыт. 380 кыттааччы бырайыактарын көмүскүүр кыахтаммыттара.
Муус устар 25 күнүттэн 29 күнүгэр диэри бырабыыталыстыба бэрэссэдээтэлин бастакы солбуйааччы э.т. – тыа хаһаайыстыба миниистирин солбуйааччы э.т. Петр Алексеев салайааччылаах хамыыһыйа граҥҥа кандидаттар 70-80 сайабылыанньаларын көрүөҕэ.
