Баһаартан куттал суох буолуутун бырагырааматын чэрчитинэн, Өлүөхүмэ оройуонугар өрөспүүбүлүкэттэн биэс «Урал» баһаарынай массыына тиийдэ. Массыына күлүүстэрин туттарыы үөрүүлээх быһыыга-майгыга ааста.
Бу техникаттан түөрдэ нэһилиэктэргэ бэрилиннэ Өлүөхүмэ куораттан саамай тэйиччи сытар Чапаево сэлиэнньэҕэ, Токкоҕо, Абаҕаҕа, төрдүс — Нөөрүктээйигэ. Оттон биир автокирилиэстээх массыына куорат баһаарынай чааһыгар хаалла. Маннык техника мэндиэмэннээх дьиэлэргэ кутталлаах сиртэн дьону көһөрүүгэ, баһаары умуруорууга аналлаах.
