Ааспыт сыл атырдьах ыйыгар Ростов-на-Дону куорат федеральнай суута украинскай режиссер Олег Сенцову Крым сиригэр-уотугар терактары бэлэмнээһиҥҥэ буруйдааҕынан билинэн, 20 сылга кытаанах режимнээх холуонньаҕа көҥүлүн быһарга уурбута. Оттон кини куомуннааҕа Александр Кольченко 10 сылга көҥүлэ быһыллыбыта.
РФ Накаастабылы толорор федеральнай сулууспатын Саха сиринээҕи управлениетын пресс-сулууспата иһитиннэрбитинэн, Олег Сенцов кулун тутар 16 күнүгэр Дьокуускай куорат 1 №-дээх Силиэстийэлиир изоляторыгар этабынан аҕалыллыбыт.
Кэлээтин, ирдэбил быһыытынан, доруобуйатын туругун бэрэбиэркэлээбиттэр — этигэр-сиинигэр эчэйиитэ суох, бэйэтэ да «ыалдьабын» диэн үҥсэргээбэтэх. Күн аайы ыытыллар «обход» кэмигэр специалистарга сылдьарга суруттарбатах.
Бэҕэһээ, кулун тутар 22 күнүгэр, террорист Олег Сенцов Дькуускай куорат 1 №-дээх кытаанах режимнээх холуонньатыгар буруйун боруостааһына саҕаламмыт.
