29 Кулун тутар 29.03
  • -15°
  • $ 92,26
  • 99,71

Накаастабылы толорор уорганнар ыһыахтара Киинэ сылыгар ананна

17:43, 27 июня 2016
Читайте нас на
Яндекс Новости
ЯДВ

Холуонньаларга үлэлиир дьон ыһыаҕа кытары уратылаах. Кинилэр бу күн ыарахан тыыннаах хаайыылартан ис дууһаларыттан сынньаналлар, сүргэлэрэ көтөҕүллэн туран кытталлар. Ыһыахтарыгар сыл инниттэн бэлэмнэнэллэр диэтэххэ, омуннааһын буолуо суоҕа.

Ыһыах ыһалларын сэргэ, холуобунай-исполнительнай систиэмэ үлэһиттэрин фестивалын эмиэ бу күн ыыталлар. Уонча сылтан бэттэх ити — үтүө үгэс. Быйылгы, бэс ыйын 24 күнүгэр ыытыллыбыт ыһыахтара, фестиваллара Киинэ сылыгар ананна.

Ыһыах холуонньалар хамаандаларын билиһиннэриилэриттэн саҕаланна. Хас биирдии хамаанда урукку сэбиэскэй киинэлэртэн, остуоруйалартан сөбүлүүрүн талан ылан, тиэмэтин онно анаабыт. Ол курдук, бу күн “Ирония судьбы или С легким паром!”, “Три мушкетера”, “Свадьба в Малиновке”, “Цыган. Возвращение Будулая”, “Операция “Ы”, “Кавказская пленница”, “Приключения Буратино” уо.д.а киинэлэр дьоруойдарын илэ харахпытынан көрөн, күллүбүт-үөрдүбүт. Маныаха киһи кэрэхсиирэ баар – үлэһиттэр оҕолоро эмиэ кытталлара.

Бу накаастабылы толорор уорганнар ыһыахтарыгар сылын аайы сылдьар киһи бииртэн сөҕөбүн – ханнык да тиэмэҕэ ананнын, көстүүмнэригэр, атрибутикатыгар тиийэ ымпыктаан-чымпыктаан, улахан эппиэтинэстээхтик сыһыаннаһан бэлэмнэнэллэр. Түһүлгэлэрин эмиэ Киинэ сылыгар анаан оҥорбуттар, киэргэппиттэр.

Итинник билиһиннэрии кэнниттэн ыһыах аһыллыытын сиэрин-туомун Айыы үөрэҕин тарҕатааччы Лазарь Афанасьев-Тэрис былыргылыы, бэрт уратытык толордо.

Ыһыахха накаастабылы толорор уорганнарга үлэлээбит бэтэрээннэр, Уопсастыбаннай сэбиэт чилиэннэрэ ыҥырыылаах ыалдьыт быһыытынан сырыттылар. Россия Накаастабылы толорор федеральнай сулууспатын Саха сиринээҕи управлениетын начальнигын солбуйааччы, ис сулууспа полковнига Владимир Узлов УИН урукку начальнига, полковник Семен Янҥа “Россия ХИС-тин сайыннарыыга кылаатын иһин” диэн үрүҥ көмүс мэтээли туттарыыта долгутуулаах түгэнинэн буолла.

Эбиэттэн киэһэ хамаандалар куонкурус саамай чаҕылхай түһүмэҕэр киинэлэртэн быһа тардан инсценировкалары көрдөрдүлэр. Ыллаан-үҥкүүлээн, хамсанан-имсэнэн, көрү-нары көҕүлүттэн тутан, дьиҥнээх идэтийбит артыыстартан туох да итэҕэһэ суохтук толордулар.

Киэһэлик мас тардыһыытыгар, хапсаҕайга уонна канаат тардыһыытыгар ыһыылаах-хаһыылаах, бэрт тыҥааһыннаах күрэхтэһиилэр ыытылыннылар.

Жюри быһаарыытынан, уопсай түмүккэ фестиваль-куонкурус кыайыылааҕынан эмиэ былырыыҥҥы курдук, хонбуойдааһын отдела буолла. 5-с №-дээх эмтиир-көннөрөр холуонньа хамаандата иккис миэстэҕэ тигистэ, оттон үһүс миэстэҕэ 1 №-дээх Силиэстийэлиир изолятор хамаандата таҕыста.

Следите за самым важным и интересным в Telegram-канале и WhatsApp-группе ЯСИА