29 Кулун тутар 29.03
  • -14°
  • $ 92,26
  • 99,71

Кирбэй нэһилиэгэр үөрэх миниистирэ үлэлээтэ

11:46, 22 июня 2016
Текст:
Читайте нас на
Яндекс Новости
ЯДВ

Саха Өрөспүүбүлүкэтин Үөрэҕин миниистирэ Феодосия Габышева Харыйалаах бөһүөлэгэр оҕолор хас да дьиэнэн тарҕанан үөрэнэр кыһалҕаларын кытта билистэ.


Үөрэх миниистирэ Феодосия Габышева саҥа оскуола-саад тутуллуохтаах сирин көрдө. «Тутуу барыахтаах сирин түргэнник чуолкайдыыргыт наада, төһөнөн түргэнник быһаараҕыт да, соччонон тутуу үлэтэ түргэнник хамсыа», — диэтэ кини. Итиэннэ үрэх уҥуор оҕо тэрилтэтэ тутуллара көҥүллэммэтин тоһоҕолоон бэлиэтээтэ. «Үрэх уҥуор туттарар түгэҥҥитигэр, муоста тутарга үтүмэн үп ороскуоттаныа, онон оскуола-саады бөһүөлэк ортотугар тутулларын курдук биир санааҕа кэлиэххитин наада», — диэн миниистир эбэн эттэ.

Тутуллуохтаах оскуола таас варианынан 120 оскуола, 75 оҕо саадын оҕотугар анаан техническэй сорудаҕа оҥоһуллан турар, билигин бырайыактыыр үлэлэрэ толорулла сылдьаллар. Оскуола 50 куб.кв. иэннээх актовай саалалаах уонна спортивнай саалалаах буолуохтаах.

Салгыы Федосия Васильевна «Кэрэчээнэ» оҕо саадыгар сылдьан дьиэни-уоту көрдө. Мантан быйыл 17 оҕо оскуолаҕа киириэхтээх, кэлэр сылга бэлэмнэнии бөлөҕөр 25 оҕо киирэрин сэбиэдиссэйэ А.Н. Семенова кэпсээтэ. Онон саҥа киэҥ-куоҥ дьиэни туруорсаллара оруннаах.

«Өлөөн» МУТ директора М.Х. Николаева «Күөнэлэкээн» көс оскуолаҕа саҥа тииптээх оскуола дьиэ кэлбитин махтанан туран иһитиннэрдэ. Марина Христофоровна оскуола оҕолорун сайыҥҥы уһун өрөбүллэригэр ыстаадаҕа барыыларыгар уонна күһүн төннөллөрүгэр вертолет өҥөтүн туһаналларыгар үөрэх министиэристибэтэ көмөлөһөрүгэр этии киллэрдэ. Кыра авиация көтүүтүн, ыстаадаҕа үлэлии барыан баҕалаах оҕолорго урукку курдук оскуола баазатыгар «Оленеводство» уруогун киллэрэри туруоруста. «Күөнэлэкээн» көс оскуола салайааччыта К.В. Кириллова  көс оскуолаҕа интернет ситимэ хаачыстыбалаахтык үлэлииригэр сөптөөх техническэй өттүнэн хааччылларын туруоруста.

Федосия Габышева: «Өлөөн улууһа промышленнай улуус буолуо, онон оҕолоргутун техническай, оробуочай идэлэри баһылыылларын курдук бэлэмниир үлэни күүһүрдүөххүтүн наада. Мииринэй оройуонугар баар итинник идэлэргэ бэлэмниир үөрэх тэрилтэлэрин кытта сибээһи олохтооҥ. Эһиги олоххутугар көстөр, өрүү баар кыһалҕалары сөптөөхтүк туруорсар буолаҥҥыт, хайа да улуустан бастакынан боппуруостаргыт олоххо киирэллэрин ситиһэҕит, итинэн бырайыактар оҥоһуллан сокуон ылылларыгар күүстээх дьайыыны оҥороҕут», — диэн махталын биллэрдэ.

Үөрэх миниистирэ «Арктика оҕолоро» бырайыагы өйүөх буолла. Бырайыак олоххо киирдэҕинэ оҕолор үөрэххэ туттарсалларыгар, доруобуйаларын көннөстөллөрүгэр, сынньаналларыгар, интернетинэн туһаналларыгар, талааннарынан, үөрэхтэринэн араас конференцияларга, куонкурустарга кытта баралларыгар айан төлөбүрэ көрүллэригэр күүстээх бырагыраама буолуохтаах.

Миниистири кытта сирэй көрсөн элбэх ыйытыы бэрилиннэ, итиэннэ элбэҕи эрэннэрэр эппиэттэри иһиттибит.

Следите за самым важным и интересным в Telegram-канале и WhatsApp-группе ЯСИА