25 От ыйа 25.07
  • 30°
  • $ 86,55
  • 94,38

"Иван Шишкин" быыстапкаҕа живопись уонна графика сэргэ, көрөөччүлэри от-мас сыта күүтэр

Читайте нас на
Яндекс Новости
ЯДВ

Муус устар 7 күнүттэн Саха сирин Национальнай художественнай музейыгар улуу нуучча пейзажиһа Иван Иванович Шишкин (1832-1898) Татарстан судаарыстыбыннай ойуулуур-дьүһүннүүр музейыттан кэлбит хартыыналарын уонна графическай үлэлэрин быыстапката саҕаланна. Улахан таһымнаах быыстапка Саха Өрөспүүбүлүкэтин Национальнай художественнай музейа төрүттэмитэ 95 сылыгар ананар диэн, СИА музей пресс-сулууспатыгар сигэнэн иһитиннэрэр.

«Иван Шишкин» быыстапкаҕа Татарстан өрөспүүбүлүкэтин судаарыстыбыннай ойуулуур-дьүһүннүүр музейа муспут улуу худуоһунньук биллэр айымньылара туруохтара. Барыта 83 айымньы талылынна: 33 — живопись, 50 – графика. Онуоха графиканы икки түһүмэҕинэн көрдөрүөхтэрэ, 25 лиистээх экспозицияны үс ыйынан уларытыахтара. Бу аһаҕас сиргэ көрдөрөргө туруоруллбут ураты ирдэбил быһыытынан. Быыстапка 2023 с.  муус устар 7 күнүттэн балаҕан ыйын 30 күнүгэр диэри  Дьокуускай куорат, Киров уул 9, Художественнай музей сүрүн дьиэтигэр туруоҕа.

Иван Шишкин” быыстапката — култуура эйгэтигэр 2023 сыл биир саамай бэлиэ тэрээһинэ буолар. Быыстапкаҕа үс күн иһигэр 750 тахса киһи сырытта. Шишкин айымньылара балаҕан ыйын 30 күнүгэр диэри туруохтара, онуоха диэри музейга экскурсиялар, араас маастар-кылааста,  тэрээһиннэр былааннаналлар. Холобур, билигин СО РАН ботаническай саадын кытары быыстапкаҕа анаан мутукча, мас-от, үүнээйи сыттарын, ону таһынан үүнээйи, от-мас сорохторун көрдөрөн, анал интерактивнай эйгэ оҥоһулунна. Онон көрөөччүлэр быыстапканы толору ылыналларыгар, дьон искусствоҕа сыстарыгар, илэ хараҕынан көрөн өйдүүрүгэр төһүү күүс буолар”, — диэн  СӨ НХМ социокултуурунай хардарыта дьайыылары иилиир отдел салайааччыта Сардана Посельская кэпсээтэ.

Санатан эттэххэ, Шишкин айымньыларын суолтатынан уонна хомуйуутунан Татарстан музейын коллекцията Судаарыстыбыннай Третьяковскай галерея уонна Нуучча музейын кэнниттэн дойдуга үһүс миэстэҕэ турар. «На покосе в дубовойроще», «Швейцарский пейзаж» (1866), «Полянка» (1897), «На даче» (1894) уо. д.а. биллэр хартыыналар бастакы икки саалаҕа тураллар.

  • Улахан дьоҥҥо киирии билиэт – 600 солк.
  • 18 сааһын ситэ иликтэргэ – 300 солк.
  • Үрдүк уонна орто үөрэх кыһатын устудьуоннарыгар 300 солк.
  • Худуоһунньук идэтигэр үөрэнээччилэргэ 200 солк.
  • Биэнсийэлээхтэргэ – 400 солк.
  • Элбэх оҕолоохторго – 300 солк.
  • Сэрии бэтэрээннэригэр, байыаннай дьаһал кыттыылаахтарыгар кинилэр дьиэ кэргэттэригэр тустаах докумуону көрдөрдөхтөрүнэ – босхо
  • I уонна II бөлөх инбэлииттэргэ, тулаайах оҕолорго — босхо
  • 10-30 киһилээх оскуола оҕолорун бөлөхтөрүгэр – 200 солк. (икки улахан киһи босхо)
  • 7-гэр диэри саастаах оҕолорго – босхо
  • Арассыыйа худуоһунньуктарын сойууһун чилиэттэригэр – 200 солк.

Экскурсия туспа төлөбүрдээх, 8 (4112) 33-52-79 эрийэн билсин.

Быыстапка туһунан сиһилии музей саайтыгар киирэн көрүн www.sakhamuseum.ru

Үлэ режимэ: сэрэдэ 12.00-20.00 (каасса 19.30 ч. диэри); бэнидиэнньик-оптуорунньук, чэппиэр-өрөбүл 10.00-18.00 (каасса 17.30ч. диэри). Сиһилии тел.: 8 (4112) 33-52-79, 8 (4112) 33-52-80 нүөмэрдэринэн эрийэн билсиэххэ син.

Следите за самым важным и интересным в Telegram-канале и WhatsApp-группе ЯСИА
Тутаах тыллар