Атах таҥаһын кырааскатынан ыһыспыттар айдааннара быһаарылынна, өрүттэр бэйэлэрин санааларын этиннилэр. Бу туһунан СИА-ҕа регион гражданскай уопсастыба институттарын сайдыытын миниистирин бастакы солбуйааччы Иван Луцкан иһитиннэрдэ.
Санатар эбит буоллахха, видеоҕа уһуллан тарҕаммыт сааттаах быһыы уопсастыбаҕа өйдөнүллүбэт түгэни таһаарбыта. Карен Мартиросян киһи сирэйигэр атах таҥаһын кырааскатын ыспыта. Маннык быһыыны-майгыны көрбүт кыыһырбыт дьон атах таҥаһын оҥорооччуга тиийэн кэлэн, бэйэтин оннук кыраасканан сабыта ыспыттара.
Полиция үлэһиттэрэ быһылаан кыттыылаахтарын туппуттара. Куорат суута Мартиросяны «мелкое хулиганство» диэнинэн биэс суукка хаайарга быһаарбыта, онтон кыраасканан ыһыллааччыны «көмүскээбит» «Урааҥхай» уопсастыбаннай хамсааһын лидерэ Тургун Попов 1000 солк. ыстыраап төлүүрүгэр уураахтаабыта.
«Бу омуктар иирсээннэрэ буолбатах. Попов бэйэтин гражданин быһыытынан позициятын көрдөрбүт, онно дьон убаастабыллаахтык сыһыаннаспыт. Ханнык баҕарар эр киһи маннык сиэрэ суох быһыыны көрдөҕүнэ итинник быһаарыыны ылыан сөбө буолуо дии саныыбын. Ол гынан баран, сокуон чэрчитинэн дьайыылары оҥоруохха наада. Иирсээн суох. Быһылаан кыттааччылара эппиэтинэскэ тардылыннылар. Биһиги тахсыбыт балаһыанньаны сөпкө быһаарыыга кытынныбыт: армяннар түмсүүлэригэр мунньах буолла. Манна көхтөөх дьон, ыччат, суруналыыстар ыҥырыллан кэллилэр. Буолбут түбэлтэҕэ сыана быһылынна«, — диэтэ Иван Луцкан.
Миниистири бастакы солбуйааччы этэринэн, Саха сиригэр омуктар уонна араас итэҕэллээхтэр икки ардыларыгар сыһыан биир кэм туруктаах: «Тахсыбыт быһылааҥҥа сыананы мин буолбакка, нэһилиэнньэ биэриэн наада. Сылын аайы былаас нэһилиэнньэ ортотугар опрос ыытар. Онно олохтоох дьон 70 бырыһыана Саха сиригэр бу хайысха туруктааҕын этэр«.
Луцкан дьон бэйэ-бэйэтигэр социальнай статуһуттан уонна балаһыанньатыттан тутулуга суох убаастабыллаахтык сыһыаннаһыахтаах диир. «Бу буолан ааспыт быһылаан сиэрэ суох быһыы буолар. Бастаан киһини күлүү-элэк оҥостоллор, онтон видеоҕа устан аһаҕас ситимҥэ ыыталлар. Маннык иирсээн олох атыннык киһи үөйбэтэх өттүнэн эргийэн тахсыан эмиэ сөп этэ. Омугуттан, итэҕэлиттэн тутулуга суох буруйа суох дьон, оҕолор эмсэҕэлиэхтэрин сөп этэ. Киһи киһинэн хаалыахтаах«, — диэтэ кини.
