Өрөспүүбүлүкэтээҕи харах балыыһата эппэрээссийэ оҥоруутугар 2021 сылга саҥа тэриллэри үлэлэтэр. Ол туһунан кылаабынай быраас Иван Луцкан социальнай ситимнэринэн эттэ, суруйар СИА.
«Харах балыыһата араас көрүҥнээх эппэрээссийэни оҥорууга тэриллэринэн хааччыллар. Ааспыт сылга доруобуйа харыстабылын министиэристибэтинэн харахтарыгар катаракталаах ыарыһахтарга хрусталиктарын уларытарга эппэрээссийэ ыытар тэрил ылбыппыт», — диэтэ Иван Луцкан.
Кылаабынай быраас эппитинэн, ааспыт сыл бүтүүтэ тустаах министиэристибэ быһаарыытынан, офтальмологическай комбайн ылыытыгар үп көрүллүбүт. Бу харах ыарыытыгар араас эмтээһини оҥорууга аналлаах. Тэрили 2021 сыл иккис кыбаарталыгар ылаллар.
