29 Кулун тутар 29.03
  • -14°
  • $ 92,26
  • 99,71

Ил Түмэн депутаттара Хочоҕо, Тиэлигигэ, Чыамайыкыга үлэлэрин отчуоттаатылар

14:35, 29 января 2016
Текст:
Читайте нас на
Яндекс Новости
ЯДВ

Хочо бөһүөлэгэр олохтоохтору саамай долгутар боппуруоһунан киин хочуолунайы туттарыы буолар. Саҥа хочуолунайы туттарыыга үп-харчы көһүннэҕинэ, ол эрэн нэһилиэк баһылыга бэйэтин сүүрүүтүнэн-көтүүтүнэн, Матта бөһүөлэгин холобурунан хочуолунайы туттарыыга атын хайысхалары үөрэтэригэр эттилэр. Александр Романов гаас киллэриллибэт нэһилиэктэригэр олохтоохтор киин хочуолунайга холбонууга бары үлэлэһиэхтээхтэр диэтэ. Нэһилиэккэ саҥа кулууп каркаһа туруоруллубут. Николай Старостин инникитин нэһилиэк дьаһалтата саҥа кулуубу уонна спорт саалатын ититии иһин ороскуоттанар үбү уйунара уустук, онон икки объегы ититиигэ олохтоохтор уонна нэһилиэк депутаттара сүбэлэһэллэригэр эттэ. Балыыһа үлэһитэ Раиса Барашкова 4 нэһилиэк ыарыһахтарын көрөр-истэр балыыһаҕа үс эрэ куойка көрүллэрэ ыарахан диэтэ. Юрий Петровичка аадырыстаан оҕо саадтарыттан саҕалаан социальнай педагог көрүллүүтүн, гражданскай кэргэннии буолуу уо.д.а.тустарынан ыйыттылар.

Тиэлигигэ саҥа культурнай-спортивнай киин тутуллуохтаах, матырыйаала аҕалыллыбыт. Олохтоохтор үөрүүлэригэр нэһилиэккэ быйыл үрдүк кыамталаах саҥа  хочуолунай үлэҕэ киллэриллиэхтээх. Бааһынай хаһаайыстыбалар бэрэстэбиитэллэрэ «Тыа хаһаайыстыбатын туһунан” сокуону туоһуластылар.  Нэһилиэк олохтооҕо Василий Солдатов суолу-ииһи оҥорууга, тутууга тендергэ кыайбыт үлэһиттэри хонтуруоллуур үлэ барар дуо диэн ыйыппытыгар, Александр Романов  анал хамыыһыйа тэрийэн, сакаасчыты ыҥыран отчуоттатар эбээһинэстээххит диэтэ. Тиэлигигэ бөрө буулаабытын, сылгылары тардарын иһитиннэрдилэр.

Чыамайыкыга ааспыт сылга чааһынай дьиэлэри киинннэммит ититиигэ холбооһун үлэтэ эмиэ үчүгэйдик барбыт. Онуоха ититэр ситимтэн тэйиччи дьиэлээхтэр хайдах ититиллэбит диэн ыйытыыны туруордулар. Депутаттар уонна улуус баһылыга лоомтукалар, томтордор холобурдарынан термороботу туһаналларыгар сүбэлээтилэр. Олохтоох кырдьаҕас Егор Семенов биир гектар сири туора дьоҥҥо тоҕо буор-босхо ыһан кэбиһэллэрий диэн ытырыктата саныыр ыйытыытыгар Александр Романов Россия салалтата сахалартан сири былдьыахха диэн санааттан буолбакка, элбэх сирдээх-уоттаах регионнарга дьону олохсутуу геополитиката  ыытыллар диэн эппиэттээтэ.

Улуус баһылыга Николай Старостин Чыамайыкы сирэ-уота көмүскэллээх, онон дьаахханар оруна суох диэн быһаарда. Павел Дьячковскай волонтердары быйыл сайын сирин-уотун күрүөлээһиҥҥэ тутар этэрээт уолаттарын көмөлөһүннэрэ ыыталларыгар көрдөстө. Егор Семенов республикаҕа аһары улахан хотоннору тоҕо туталларын итиэннэ саха сүөһүтүн элбэтиигэ туох үлэ ыыталларын туоһуласта. Юрий Баишев «Туймаадализинг» нөҥүө оҥоһуллубут 100-тэн тахса сүөһү киирэр хотоннорун көдьүүстэрэ суохтарынан сирэбит диэтэ уонна министр Александр Артемьев биир бырйыагынан аҕыйах сүөһү киирэр хотонноругар ылсыахха диэн этии киллэрдэ. Улууска спорт уонна физкультура сыла биллэриллибитинэн, олимпиецтар ааттарынан турнирдары тэрийиэххэ диэтилэр.

Үс нэһилиэк олохтоохторо депутаттарбыт улууһу кытта ыкса сибээстээхтик үлэлииллэр диэн сыана быстылар.                   

Следите за самым важным и интересным в Telegram-канале и WhatsApp-группе ЯСИА