Мунньахха уопсайа 100 киһи — улуус мунньаҕын салайааччылара уонна депутаттар кыттыыны ылыахтара. Тэрээһин туһунан Ил Түмэн олохтоох салайыныы боппуруостарыгар сис кэмитиэтин бэрэссэдээтэлэ Василий Местников санаатын үллэһиннэ.
«Александр Жирков бэрэссэдээтэллээх Саха Өрөспүүбүлүкэтин V ыҥырыылаах Ил Түмэнин көҕүлээһининэн Дьокуускай куоракка 2017 сыл кулун тутар 29-30 күннэригэр, олохтоох салайыныы тиһигэр бэрэстэбиитэллээх органнар уонна нэһилиэк депутаттарын оруолларын, статустарын үрдэтиигэ туһуламмыт бастакы сийиэһи тэрийэн ыыппыппыт. Бу Саха сирин историятыгар бастакы тэрээһиҥҥэ биһиги депутаттар үлэлэрин ис хоһоонун тупсарарга, бэрэстэбиитэллээх оргаҥҥа кинилэр боломуочуйаларын үрдэтиигэ үлэбит хайысхатын туһаайбыппыт. Бу кулну тутар 1 күнүнээҕи мунньахха былырыын бастакы сийиэскэ ылыныллыбыт резолюция туолуутун, үлэ хайдах бара турарын кэпсэтиэхпит. Итини сэргэ Ил Түмэн иһинэн муниципальнай тэриллиилэр бэрэстэбиитэллээх органнарын депутаттарыттан 72 чилиэннээх Сэбиэти тэрийиэхпит. Бу Сэбиэккэ улуус мунньаҕын салайааччылара уонна улуустан биирдии депутат талыллыаҕа. Сэбиэт сылга иккитэ мустан мунньахтыаҕа. Ити Сэбиэккэ киирбит депутаттартан биэс киһилээх Президиуму талыахпыт. Бу Президиум чилиэннэрэ үлэ хаамыытын көрөн мустан мунньахтыыр буолуохтара», — диэн Василий Местников иһитиннэрдэ.
Мунньахха түмсүбүт депутаттар Ил Түмэн сис кэмитиэттэрин бэрэссэдээтэллэрин, Бырабыыталыстыба чилиэннэрин кытары көрсөн кэпсэтиэхтэрэ.
«Бүгүн олохтоох салайыныы — норуот былааһа. Дьокутааттар нэһилиэнньэни былаастыын холбуур, ситимниир улахан суолталаах соруктаахтар. Дьиҥэ, кинилэр норуоттан талыллаллар буоллахтара. Россия таһымыгар олохтоох салайыныы сокуоннара барыта бэрэстэбиитэллээх былааска ананаллар. Дьокутааттар бүгүн сүрүн үбү-харчыны быһаараллар, бүддьүөтү ылыналлар.. Нэһилиэк, улуус сайдыытын, кэскилин быһаарар, түстүүр дьоммут кинилэр буолаллар. Муниципальнай тэриллиилэр үлэлэрин кинилэр хонтуруоллууллар. Ол иһин олохтоох салайыныы сокуоннарыгар, дьокутааттарга сүрдээх улахан суолта бэриллэр», — диэн Ил Түмэн олохтоох салайыныы боппуруостарыгар сис кэмитиэтин бэрэссэдээтэлэ Василий Местников бэлиэтээн эттэ.
