COVID-19 тарҕаныытын бохсор өрөспүүбүлүкэтээҕи суһал ыстаап мунньаҕар Ил Дархан култуура, спорт, атыы-эргиэн дьиэлэригэр дьон мааска, бэрчээккэ кэтэрин күүскэ хонтуруоллууру сорудахтаата.
Дьокуускай поликлиникаларыгар итиэннэ суһал көмө диспетчерскэй сулууспаларыгар эбии оператордары уонна волонтердары эппиттэрин туһунан вице-премьер, суһал ыстаап салайааччытын солбуйааччы Ольга Балабкина иһитиннэрдэ. «Колл-центрдарга эмиэ ХИФУ мэдиссиинэ институтун ординатор-устудьуоннарын эбэр санаалаахпыт. Кинилэр куорат поликлиникаларын итиэннэ суһал көмө диспетчерскэйдэрин үлэлэрин чэпчэтиэхтэрэ итиэннэ дьоҥҥо кэмигэр сүбэ, көмө оҥоруохтара», — диэтэ вице-премьер.
Доруобуйа харыстабылын миниистирэ Елена Борисова бүгүн күн устата Дьокуускай стационардарыгар эбии 120 куойка миэстэтин тэрийэллэрин туһунан эттэ.
Кирииптэн бүгүҥҥү күҥҥэ нэһилиэнньэ 52%-на быһыы ылбытын, ити иһигэр 62,3% — оҕо аймах, 45,4% — улахан дьон буоларын Роспотребнадзор салайааччыта Маргарита Игнатьева иһитиннэрдэ. Бастатан туран, вакцинаны мэдиссиинэ үлэһиттэрэ, учууталлар, ЖКХ, социальнай эйгэ үлэһиттэрэ уонна 65-н ааспыт дьон ылтар.
Айсен Николаев ыарыыны бохсор туһуттан уопсастыбаннай сирдэргэ дьон харыстанар сириэстибэлэри туһаналларын хонтуруоллуур наадатын, маҕаһыын үлэһиттэрэ булгуччу мааска, бэрчээккэ кэтиэхтээхтэрин тоһоҕолоото. Дьокуускайга, улахан оройуоннар кииннэригэр хонтуруоллуур-рейдэлиир тэрээһиннэр уопсастыбаннай тырааныспарга, сааратар сирдэргэ ыытыллыахтаахтарын эттэ.
Санитарнай ирдэбиллэри тутуһуу, мааска бэрчээккэ кэтэ сылдьыы, дьонтон дьалты туттуу харыстаныы сүрүн миэрэлэринэн буоларын COVID-19 тарҕаныытын бохсор өрөспүүбүлүкэтээҕи суһал ыстаап санатар.
