Ил Дархан Айсен Николаев Булуҥ оройуонугар анал байыаннай дьаһал кыттыылааҕа Аркадий Дьяконов дьиэ кэргэнигэр сырытта. Байыаннай сулууспалаах бу күн дойдутугар кэлбит.
Дьяконовтарга алта оҕо улаатар. Аркадий — улахан уол, кыралара — икки саастаах. Дьиэ кэргэн олоххо көхтөөх көрүүлээхтэр, спортсменнар. «Анал байыаннай дьаһал саҕаламмытыгар, кини патриот быһыытынан, баҕа өттүнэн тылланан армияҕа барбыта. Бэс ыйыгар Аркадий бааһырбыта. Эмтэнэн баран дойдутугар кэллэ», — диэн суруйда Айсен Николаев телеграм-ханаалыгар.
Аркадий волонтердарга махтанарын биллэрдэ, госпиталга киирбит күнүттэн киниэхэ өйөбүл, күүс-көмө оҥорбуттарыгар. Ил Дархан төрөппүттэригэр уолларын иитиилэригэр махтанна уонна үтүөрэригэр баҕа санаатын эттэ.
