Хапсаҕай бэтэрээнэ, хапсаҕай Федерациятын толорооччу дириэктэрэ Алексей Мостахов 75 сааһын туолла. Кинини үбүлүөйүнэн бииргэ үлэлиир дьоно эҕэрдэлээтилэр.
Алексей Егорович Мостахов 1946 сыл ахсынньы 19 күнүгэр Ньурба улууһугар төрөөбүт. Кини ССРС көҥүл тустууга спортка маастара, норуоттар ардыларынааҕы ФИЛА категориятын 1 кылаастаах судьуйата, ФИЛА тустуу төрүт көрүҥнэригэр норуоттар ардыларынааҕы судьуйата, спортивнай тэрийээччи. Эдэр дьоҥҥо, бэтэрээннэргэ үгүс турнирдар призердара, чөмпүйүөннэрэ. СӨ спортка үтүөлээх үлэһитэ, Арассыыйа спортка туйгуна, Д.П. Коркин аатынан судаарыстыбаннай бириэмийэ лауреата.
Мостахов өрөспүүбүлүкэ, норуоттар ардыларынааҕы таһымнаах күрэхтэһиилэргэ судьуйалаабыта. Бүтэһик 20 сылга хапсаҕай сайдарын, норуоттар ардыларынааҕы таһымҥа тахсарыгар үгүс сыратын, билиитин-көрүүтүн уурбута.
Алексей Егоровиһы үбүлүөйүнэн СӨ спортка миниистирэ Иннокентий Григорьев, көҥүл тустууга Арассыыйа спортка маастара Николай Чукров, судьуйа, Баһылай Манчаары аатынан «Модун» спорт төрүт көрүҥнэригэр киин исписэлииһэ Андриан Захаров, спортивнай суруналыыс, фотограф Владислав Коротов эҕэрдэлээтилэр. Кинилэр Алексей Егорович спортка өр сылларга бэриниилээх үлэтин, хапсаҕайга өрөспүүбүлүкэ устуоруйатын киэҥник билэрин, судьуйалыырга баай уопутун, кырдьыктаах үлэтин, спортивнай эйгэҕэ аптарытыатын бэлиэтээтилэр.
