Хаҥалас оройуонун Үөдэй нэһилиэгэр 13-түү саастаах кыргыттар сөтүөлүү сылдьан ууга былдьаннылар. Олохтоохтор этэллэринэн, кыргыттар дэриэбинэттэн чугас Өлүөнэ өрүс тас үөһүгэр сөтүөлүү сылдьыбыттар.
СИА редакцията билбитинэн, иэдээн оптуорунньукка, от ыйын 25 күнүгэр буолбут. Үс кыыс дэриэбинэттэн чугас сөтүөлүү сылдьыбыттар. Сотору улахан дьон хаһыы истэн, көмөҕө кэлбит. Биир кыыстарын быыһаабыттар, икки кыыс ууга былдьаммыт.
Быраабы араҥаччылыыр уорганнар иһитиннэрбиттэринэн, миэстэтигэр силиэстийэлиир дьаһаллар ыытыллаллар. Сайын саҕаланыаҕыттан Саха сиригэр 20- тэн тахса киһи ууга түһэн өллө. Киһи өлүүлээх быһылаан үксэ сөтүөлүүргэ анамматах сирдэргэ тахсар. Аҕыйах хонуктааҕыта Амма өрүскэ эр киһи тимирбит.
