Бэс ыйын 24 күнүгэр, Үөһээ Бүлүү улууһун ыһыаҕын чэрчитинэн, Моҕол ураһаҕа Аҕа дойду улуу сэриитин кыттыылааҕа, олоҥхоһут, оһуохайдьыт, ырыаһыт Андрей Титович Титаров “Хардааччы бэргэн” олоҥхотун улуустааҕы култуура департаменын салайааччыта Айталина Мойтохонова кылгатан таһаарбыт кинигэтин сүрэхтэниитэ буолла.
Бу кинигэ Андрей Титович төрөөбүтэ 110 сылыгар, Россияҕа норуоттар сомоҕолоһууларын, Саха сиригэр биллэриллибит култуура сылларыгар ананан “Айар” кинигэ кыһатыгар 1200 экземплярынан бэчээттэннэ.
Андрей Титович Титаров айылҕаттан айдарыылаах эргиччи талааннаах киһи этэ. Кини 1916 с. ахсынньы 16 күнүгэр Хомустаах нэһилиэгэр төрөөбүтэ. Оҕо эрдэҕиттэн улуу олоҥхоһуттары истэн улаатан, этигэр-хааныгар иҥэринэн, бэйэтэ эмиэ олоҥхоһут буолбут. “Хардааччы Бэргэн” олоҥхото баай тыллаах, интэриэһинэй ис хоһоонноох. Манна Айыы бухатыыра эрэллээх атын, удаҕан эдьиийин, чугас дьонун көмөлөрүнэн абааһы бухатыырын кыайара, тапталын быыһыыра кэпсэнэр.
Кинигэ кэннитигэр Андрей Титович сиэнэ, Ил Дархан Айсен Николаев эппитэ бэчээттэммит: “Олоҥхо төрөөбүт дойдуга тапталы, кырдьык өрөгөйүн, сырдык күүс хара дьайы кыайарын хоһуйар, ааспыт үйэлэртэн илдьэ кэлбит, киэн туттар сүдү айымньыбыт буолар. Айыы бухатыырыгар норуоппут үтүөҕэ-кэрэҕэ дьулуура, көмүскэс санаата түмүллэ сылдьар. Олоҥхобут биһигини үрдүккэ кынаттыыр, ыарахаттары кыайарга сирдиир, күүспүтүгэр күүс эбэр”.
Тэрээһиҥҥэ Дьокуускай куораттан Андрей Титович сиэн уола Андрей Александрович уонна Роза Семеновна Егоровтар кыттыыны ыллылар. Андрей Александрович эбэтин туһунан истиҥник ахтан-санаан ааста: «Эһэм олоҥхолууругар миигин илдьэ сылдьарын онон-манан өйдүүбүн. Биирдэ сыанаҕа тахсыһан кинини кэтэһэн олорбуттаахпын. Миэхэ анаан күөрчэх ытыйарын истиҥник ахтабын», — диэн эттэ.
Бу кинигэ кэлэр кэнчээри ыччаты иитэр-үөрэтэр суолталааҕын тэрээһин кыттыылаахтара бэлиэтээтилэр, суруйда @uoheebuluu мах-ханаал.
