Дьокуускайга сэттэ саастаах Каролина Степанова «Движения первых» саайтыгар биллэриллибит «Елка желаний» акцияҕа бэйэтин ыра санаатын суруйбута — харбыырга үөрэнии. Билигин кыыс баҕа санаата туолла.
Бырайыак Саха сиригэр куратора Самат Шамуратов кыысчаан ыра санаатын олоххо киллэриэххэ сөптөөх миэстэтин булла — адаптивнай физическай культура уонна спорт киинигэр.
Бастакы дьарыкка Каролина тренерин кытта ууга хайдах туттарга-хаптарга үөрэннэ. Киин дириэктэрэ Ньургун Иванов бэлиэтээбитинэн, кыыһы салгыы харбыырга үөрэтиэхтэрэ.
Убайа Эрсан эмиэ баҕа санаатын эппитэ — биллэр ааттаах-суоллаах артыыһы кытта көрсөрүн. «Движения первых» уолга баҕа санаата туоларыгар эрэннэрдэ.
Акция олунньу бүтүөр диэри салҕанан барар.
