СӨ Үлэҕэ уонна социальнай сайдыыга министиэристибэтин иһинэн үлэлиир «Үһүс көлүөнэ оскуола» тэриллибитэ биэс сылын чэрчитинэн, үгэскэ кубулуйбут «Ньургуһун ыһыаҕа» ытык ыалдьыттарын түмтэ.
Үһүс көлүөнэ оскуола биэс сыл устата 8000 кэриҥэ киһини хабан, 40-ча куруһуогу үлэлэтэн кэллэ. Оскуола толорооччу дириэктэрэ Тамара Аргунова туох-ханнык үлэ тэриллэрин СИА-ҕа кэпсээтэ.
«Биэнсийэҕэ тахсыбыт дьон биһиэхэ үгүстүк кэлэллэр. Биһиги 41 куруһуоктаахпыт, устуудьуйалаахпыт уонна кылгас кэмнээх куурустардаахпыт, 43 учууталлаахпыт. Сиэл-кыл, компьютер, оҕуруонан тигии, үҥкүү-ырыа куруһуоктара интэриэһи тардаллар. Иис кистэлэҥин арыйан, үҥкүү, ырыа аайы кэтэр танастарын тиктэллэр. Итини сэргэ хоһоон айааччылар, йога, «Көмүлүөк» кулууптар олус бэркэ үлэлииллэр. Литературнай куруһуокпут айар талааннаахтара быйылгы үбүлүөйдээх сылга бэйэлэрин хоһооннорунан кинигэ таһаардылар», — диэн кэпсиир кини.
«Үһүс көлүөнэ оскуола» Уус-Алдаҥҥа, Мэҥэ-Хаҥаласка, Намҥа, Тулагыга, Маҕаҥҥа, Табаҕаҕа, о.д.а сирдэргэ уопсайа аҕыс филиаллаах. Быйыл Санк-Петербурга ыытыллыбыт «Серебряный возраст» форумҥа Мэҥэ-Хаҥаластааҕы филиал делегацията, алта бырагырааманан үрдүк таһымнаахтык кыттан кэллэ. Россия общественнай түмсүүлэрин кытта ыкса сибээһи тутуу, интэриэһинэй бырайыактары суруйуу, ону көмүскээһин, өрөспүүбүлүкэҕэ аҕа саастаах дьоҥҥо аналлаах конференцияларга көхтөөхтүк кыттыы тиһиктээхтик ыытыллар. Онон ытык саастаах дьон күлүккэ хаалбакка, ыалдьыбакка сэргэхтик, уһуннук олорон үйэлэрин уһатталларыттан оскуола кэлэктиибэ үөрэр.
Ыһыах ыалдьыттарын СӨ үлэ уонна социальнай сайдыы миниистирин солбуйааччы А.П. Михеев, «Кыайыы 1941-1945 с.с.» тэрилтэ салайааччыта Г.Н. Лебедева, Саха сирин дьахталларын президиумун чилиэнэ, «Үһүс көлүөнэ оскуола» бырайыак ааптара, Дьокуускай куорат нэһилиэнньэни социальнай хааччыйыы кэлимсэ киинин дириэктэрэ Н.Н. Пахомова, дьахталлар хамсааһыннарын сойууһун аатыттан Е.С. Бястинова эҕэрдэлээтилэр.
Сыл түмүгүнэн бастыҥ үлэлээхтэр сэмэй бэлэхтэринэн, махтал суруктарынан наҕараадаланнылар. Ыһыахха ньургуһун көстүүм күрэҕэ, сыал быраҕыыга, миэстэттэн ыстаныы, маамыкта быраҕыыта, оһуохай түһүлгэтэ тэрилиннэ.
