22 От ыйа 22.07
  • 15°
  • $ 88,02
  • 96,04

Чурапчыга олимпийскай чемпион Павел Пинигин учууталыгар Дмитрий Петрович Коркиҥҥа анаабыт саҥа кинигэтэ сүрэхтэннэ

13:09, 04 сентября 2023
Сэмэн Жендринскэй хаартыскаҕа түһэриилэрэ
Читайте нас на
Яндекс Новости
ЯДВ

Саха АССР, РСФСР, ССРС үтүөлээх тренерэ, Саха АССР үтүөлээх учуутала Дмитрий Петрович Коркин төрөөбүтэ 95 үбүлүөйдээх сылыгар анаан, кини иитиллээччитэ олимпийскай чемпион Павел Пинигин “Мой учитель Дмитрий Коркин. Путь к триумфу” диэн кинигэтин суруйан таһаарда.

Кинигэ бу дьыл атырдьах ыйыгар Красноярскай куоракка “Инспаер” кинигэ кыһатыгар 1000 экземплярынан бэчээттэнэн таҕыста, 260 страницалаах, 60*90 биир гыммыт аҕыһа форматтаах, халыҥ переплеттаах, глянцевай. Кинигэ элбэх сэдэх матырыйаалларынан, ханна да тахсыбатах уникальнай хаартыскаларынан ситэриллибит.

Кинигэни “Инспаер” кинигэ кыһатын директора Вячеслав Шаманскай бырайыагынан, суруналыыс Александр Ильин-Егоров редактордаан, педагогическай наука доктора Валерий Усаков, педагогическай наука кандидата Петр Кривошапкин, ССРС успуордун маастара Михаил Друзьянов консультаннаан таһаардылар.

Ааптар Павел Пинигин: “Бу төрдүс кинигэм буолар, сериянан тахсан иһэр кинигэлэр буолаллар. Учууталбар, настаабынньыкпар үбүлүөйдээх сылынан ытык иэспин толордум.

Кинигэбэр Дмитрий Петрович олоҕун, ону таһынан научнай үлэлэрин ырытан таһаардым. Ол курдук, кэргэнэ Александра Семеновна интервьюта киирдэ. Кини Дмитрий Петрович ханна да көстүбэтэх, сырдатыллыбатах хаартыскаларын биэрбитэ, онон бу хаартыскалары бу эрэ кинигэҕэ көрүөххэ сөп. Холобур, Бөтүрүөбүс маннык үөрэн, сырдаан түспүт хаартыската суоҕун кэриэтэ. Бу биһиги олимпиадаҕа бастаабыппытыгар маннык үөрэн, дьоллонон түспүт хаартыската баар эбит.

Научнай хайысхалаах түһүмэхтэрэ тренердэргэ, тустууктарга, атын да исписэлиистэргэ олус наадалаахтар. Бэйэлэрин үлэлэригэр туһаныахтара диэн эрэнэбин.

Түмүгэр бэйэм таптаан туттар, короннай сэттэ приеммун кюар-кодтаан киллэрдим. Кинигэ нууччалыы суруллубут эбит буоллаҕына, бу түһүмэҕи сахам ыччатыгар диэн анаан, атыттартан бүөмчүлээн, сахалыы тылынан таһаардым», — диэн кэпсиир.

Кинигэ сүрэхтэниитин үөрүүлээх чааһыгар улуус баһылыга Степан Саргыдаев, успуорт миниистирэ Леонид Спиридонов, о.д.а эҕэрдэ тылларын эттилэр, киэн тутталларын биллэрдилэр.

Дмитрий Коркин үбүлүөйдээх сылын чэрчитинэн, бүгүн Чурапчы-Монголия хамаандата тустууга матчевай көрсүһүүтэ буолуоҕа.

Монголия хамаандата сарсыарда Дмитрий Коркин бүүһүгэр сибэкки дьөрбөтүн уурдулар уонна кини аатынан музейы көрдүлэр.

Елена Макаринская

Следите за самым важным и интересным в Telegram-канале и WhatsApp-группе ЯСИА