Уус Алдаҥҥа култуура эйгэтигэр үлэлээбит, үлэлиир бэтэрээннэр түмсүүлэрин көҕүлээһиннэринэн (салайааччы Мария Копырина) уонна култуура управлениетын өйөбүлүнэн бэтэрээннэргэ бэртээхэй сынньалаҥ тэриллибит. Бу туһунан СИА улуустааҕы киин бибилэтиэкэ дириэктэрэ Варвара Окоемова иһитиннэрдэ.
«Биһиги улууспут тэрилтэлэрэ үлэлээбит бэтэрээннэригэр болҕомтолорун хайаан да уурар үтүө үгэстээхтэр. Нэһилиэктэринэн араас тиэмэлээх көрсүһүүлэр, тэрээһиннэр, куонкурустар кэмиттэн-кэмигэр ыытыллаллара дьону-сэргэни сэргэхситэр. Бу күннэргэ улууспутугар култуура эйгэтигэр үлэлээбит уонна үлэлиир бэтэрээннэргэ анаан икки күннээх сынньалаҥ тэрилиннэ. Бэтэрээннэр ким баҕалаах түмсэн Өлүөнэ очуостарыгар сынньанан, Хаҥалас улууһун бэлиэ миэстэлэригэр тохтоон, дьону-сэргэни кытта сэһэргэһэн улаханнык астынан кэллилэр. Быйылгы айаҥҥа Суоттуга, Дүпсүҥҥэ, Мүрүгэ, Арыы Тииккэ, Тулунаҕа, Кэптэнигэ уонна Дьокуускайга олорор бэтэрээннэр сырыттылар. Сынньалаҥ маннык көрүҥэ сыл ахсын тэриллэрэ дьиэҕэ олорор дьоҥҥо сонун сүүрээни киллэрэр, сэниэ биэрэр. Онон сааһырбыт дьон сыл ахсын хаһан көрсүһэллэрин долгуйа күүтэллэр. Былырыын Суоттуга «Доҕордоһуу» музейыгар икки күн сылдьыбыттарын наһаа истиҥник саныыллар. Доҕотторбут-атастарбыт элбииллэр, кэпсэтэр эйгэбит кэҥиир, сүбэ-ама бэрсэбит, онон олохпутун уһатабыт дэһэллэр», — диир Варвара Николаевна.
Айаннарыгар улуустааҕы култуура управлениета (салайааччы Иннокентий Аммосов), Хаҥаласка кэллиэгэлэрэ, урукку өттүгэр улууска култуура отделын сэбиэдиссэйинэн үлэлээбит Иван Матвеев көмөлөспүттэригэр улаханнык махтаналлар.
