Ааспыт нэдиэлэҕэ Ньурба улууһугар «Полный привод. Нюрба» диэн отечественнай массыыналар күрэхтэһиилэрэ буолан ааста.
Бүлүү бөлөх улуустарын ыччат лидердэрэ: Бүлүүттэн Николай Харлампьев, Ньурбаттан Моисей Черепанов, Сунтаартан Роман Догойдонов, Үөһээ Бүлүүттэн Прасковья Тимофеева көрсөн, төгүрүк остуол тула олорон үлэлэрин-хамнастарын, инники былааннарын туһунан кэпсэттилэр, санаа атастастылар.
Прасковья Тимофеева:
— Эһиил Саха сиригэр Ыччат сыла биллэриллэринэн сибээстээн, Бүлүү сүнньүн түөрт улууһа холбоһуохха, түмсүөххэ диэн санааҕа кэллибит. Тэрээһиннэри бииргэ ыытыахха диэн сыалтан, дьыл кэмнэринэн үллэстэн, биирдии регионнааҕы күрэхтэри тэрийэргэ быһаардыбыт. Эһиил биһиги улууспутугар Манчаары оонньуулара, Бүлүү улууһугар — Олоҥхо ыһыаҕа, оттон сунтаардар бырайыагы көмүскээн кыайдахтарына, Ыччат ыһыаҕа кинилэргэ буолуохтара. Онон, эһиилги сыл Бүлүү бөлөххө олус тэтимнээх, быһаарыылаах сылынан буолар. Илин эҥэрдэр бары кыттыһан үлэлииллэрэ үчүгэй холобур буолан, биһиги даҕаны хаалсымыахха дэһэммит үлэлэһэргэ бэлэммитин биллэрдибит. Ыччат ыһыаҕа Сунтаар улууһугар буолара буоллар, барыбытыгар да үчүгэй буолуо этэ, эһиил инники миэстэни ылардыы турунабыт.
