«Азия оҕолоро» оонньуулар кыайыылаахтарын уонна призердарын уочараттаах наҕараадалааһын бэҕэһээ Хомсомуол болуоссатыгар ыытылынна.
Норуоттар ардыларынааҕы спорт оонньуутун ахсыс күнэ бэҕэһээ түмүктэннэ. Кикбоксинг, үөһэ дабайыы, мини-футбол, го, буулдьанан уонна стендовай ытыылар, брейкинг уонна да атын көрүҥҥэ итии киирсиилэр буоллулар.
Саха сирин сүүмэрдэммит хамаандата кикбоксиҥҥа түөрт кыһыл көмүстээх. Үөһэни дабайыыга бастакы кыайыылары Мария Силкина Сибирдээҕи федеральнай уокурук уонна Роман Курассов Казахстантан ыллылар.
Саха сирин футболистара «Азия оонньууларын» үрүҥ көмүс призердарынан буоллулар. Биир мээчигинэн Ураллааҕы федеральнай уокурукка баһыйтардылар. Матч 3:2 ахсаанынан түмүктэннэ.
Бары турнирдар түмүктэринэн бастыҥ вратарынан Вячеслав Ангуфьев УФО хамаандата, бастыҥ көмүскээччинэн — Егор Думаев ДФО хамаандата, бастыҥ бомбардирынан — Глеб Зырянов Саха сирэ, бастыҥ кимээччинэн — Грач Гаспарян Саха сирэ уонна бастыҥ оонньоочунан Денис Казаков УФО ааттаннылар.
«Туймаада» стадиоҥҥа 4х400 м эстафета буолла. Кыһыл көмүс мэтээли уолаттарга уонна кыргыттарга Беларусь хамаандата ылла. Иккис, үһүс миэстэлэргэ кыргыттарга, туһааннааҕынан, Сибирдээҕи уонна Ураллааҕы федеральнай уокуруктар ыллылар.
Брейкиҥҥэ кыргыттарга Анна Бакулина Москваттан кыайда. Уолаттарга Даниил Хотьков Сибиирдээҕи федеральнай уокуруктан чемпионнаата.
Оонньуулар бэс ыйын 26 күнүттэн саҕалаан, от ыйын 7 күнүгэр түмүктэниэхтээхтэр.
Хаартыска: Саина Титова/ЯСИА
