24 От ыйа 24.07
  • 28°
  • $ 87,3
  • 95,46

«Азия оҕолоро» оонньуу уота – Мэҥэ Хаҥаласка

Читайте нас на
Яндекс Новости
ЯДВ

Ыам ыйын 4 күнүгэр «Азия оҕолоро» норуоттар икки ардыларынааҕы VI оонньуу ытык уота салгыы Амма улууһуттан Мэҥэ Хаҥалас улууһун сиригэр-уотугар кэллэ.


Эстэпиэтэ «күөх төлөнө» кулун тутар 29 күнүгэр Үөһээ Дьааҥы Киһилээх хайатыттан ылыллан Дьааҥы, Эбээн-Бытантай, Аллайыаха, Усуйаана, Муома, Абый, Өймөкөөн, Томпо, Таатта, Чурапчы, Амма улуустарынан айаннаата. Сүүс хонук иһигэр 35 улууһунан, 200-чэ нэһилиэнньэлээх пууннарынан от ыйын 6 күнүгэр бу ытык уот Дьокуускайга тиэрдиллиэхтээх. Уоту арыаллааччылар ортолоругар биллиилээх экстремал-спортсмен, успуорду тарҕатааччы Дмитрий Горохов, уһун дистанцияҕа сүүрэр спортсмен Христофор Чукров уонна биһиги улууспут I-Тыыллыма нэһилиэгиттэн төрүттээх, альпинистка Анна Яковлева бааллар.

 Мэҥэ-Хаҥалас уонна Амма кыраныыссалаһар бэлиэлэригэр эстэпиэтэ уотун Амма улууһун баһылыгын бастакы солбуйааччы Петр Лебедев үөрүүлээх быһыыга-майгыга улууспут баһылыга Николай Старостиҥҥа туттарда. Аммалары улуус салалтатын бэрэстэбиитэллэрэ арыылаах алаадьынан көрүстүлэр. «Азия оҕолоро» оонньуу «күөх төлөнө» спорстмен оҕолорбутугар үрдүк ситиһиилэри аҕаллын диэн Холгума нэһилиэгин олохтооҕо, өрөспүүбүлүкэтээҕи «Олоҥхо ыһыаҕа» оһуокайын Дархан этээччи Герман Яковлев алгыс этэн амалыйда.

Холгума нэһилиэгин дьоно-сэргэтэ оонньуу уотун үрдүк таһымҥа көрүстүлэр, нэһилиэк оҕолоро бука бары Аммалыыр суолтан бөһүөлэккэ киирэр суолунан спортсменнары кытта тэҥҥэ сүүрэн кэлистилэр, күүтүлээх ыалдьыттары үҥкүүнэн, ырыанан көрүстүлэр. Анна Яковлева оҕолорго «Азия оҕолоро» оонньууларга сыһыаннаах бириистэрдээх викторинаны тэрийэн ыытта.

Холгума нэһилиэгин кэнниттэн «күөх төлөн» уоту Василий Шестаков салайааччылаах II-Наахара нэһилиэгин хамаандата көрүстэ. Факелы быйыл «Азия оҕолоро» ооньууга мас тардыһыы көрүҥэр кыттыахтаах Хочо оскуолатын 9-с кылааһын үөрэнээччитэ Коля Васильев күөрэччи тутан бөһүөлэккэ аҕалла. Оскуола таһыгар үөрэнээччилэр, учууталлар, төрөппүттэр мустаннар бу бэлиэ түгэни ырыанан-тойугунан көрүстүлэр. Салгыы уоту Ходоро нэһилиэгин олохтоохторо   уруйдаатылар-айхаллаатылар. Нэһилиэк баһылыга Алексей Васильев төлөннөөх эҕэрдэтин тиэртэ.

Уоту оскуола үөрэнээччилэрэ, улуус, өрөспүүбүлүкэ чөмпүйүөннэрэ, Уһук Илин күрэхтэһиилэрин кыттыылаахтара тутаннар уруйдаатылар-айхаллаатылар. Дмитрий Горохов нэһилиэнньэҕэ анаан эти-хааны эрчийиигэ маастар-кылааһы көрдөрдө.

Майа сэлиэнньэтигэр «Манчаары» аатынан стадиоҥҥа дьэрэкээн саардардаах үс оскуола оҕолоро трибуналары тобус-толору олороннор мааны ыалдьыттары өрөгөйдөөхтүк көрүстүлэр. «Күөх төлөнү» Ходоро нэһилиэгин баһылыга Алексей Васильев «Майа сэлиэнньэтэ» МТ баһылыгын солбуйааччы Ким Нестеровка үөрүүлээх быһыыга-майгыга туттарда. Улуус баһылыга Николай Старостин бу устуоруйаҕа хаалар бэлиэ түгэнинэн мустубут оҕолору эҕэрдэлээбитин кэнниттэн успуорт бырааһынньыга оройуттан тутулунна.

Ити курдук, «Азия оҕолоро» оонньуу уотун эстэпиэтэтэ улууспутугар Бырама, Хочо, Чүүйэ, Майа, Хара, Аллараа Бэстээх, Төхтүр, Томтор, Тумул, Төҥүлү, Тарат, Балыктаах бөһөүлэктэринэн кэрийэн ыам ыйын 7 күнүгэр Маттаттан Уус Алдаҥҥа салгыы айанныаҕа.

Следите за самым важным и интересным в Telegram-канале и WhatsApp-группе ЯСИА