Ыам ыйын 27 күнүгэр Арассыыйа киинэ тыйаатырдарыгар Саха сирин режиссера Костас Марсаан «Иччи» киинэтэ тахсар. 2017 сыллаахха уһуллубут киинэ үп-харчы, пандемия кыһалҕаларыттан киэҥ эйгэҕэ саҥа тахсар. Бу иннинэ киинэ омук киинэ фестивалларыгар кэккэ ситиһиилэрдээх.
«Иччи» Костас Марсаан иккис киинэтэ буолар. Бастакыта – «Сайсары күөлгэ түбэлтэ». Киинэ бүддьүөтэ – 26 мөл солк, саха киинэтигэр бастакы улахан үптээх киинэ. Киинэҕэ саха артыыстарын таһынан нуучча артыыстара оонньууллар, дойду бастыҥ киинэ үлэһиттэрэ кыттыгастаахтар.
«Иччи» аата да этэрин курдук иччи, сибиэн, көстүбэт эйгэ, күүстэр туһунан.
Сүрүн оруолга КВН кыттыылааҕа, блогер, артыыс Борислав Степанов оонньуур. Кинини кытары — нуучча артыыһа Андрей Звягинцев «Нелюбовь» киинэтигэр оонньообут Марина Васильева. Маны таһынан, Саха тыйаатырын артыыстара Матрена Корнилова, Ильяна Павлова, Дмитрий Михайлов о.д.а. оонньууллар.
Киинэни Art Doydu тутулуга суох Саха сирин киинэ хампаанньата устубут. Продюсер «Айыы уола», «Сайсары күөлгэ түбэлтэ» киинэлэринэн биллэр Марианна Скрыбыкина – Сиэгэн.
Борислав Степанов СИАҕа киинэҕэ уһуллуу тэрээһин өттүнэн чэпчэкитик ааспытын, үлэ хаамыыта чуолкайын, тэтимнээҕин кэпсиир.
«Киинэ табыллыбыт дииллэр. Бэйэм көрө илик буолан ордук кэтэһэбин», — диир Борислав Степанов.
Сиһилии манна аах https://ysia.ru/yakutskij-akter-borislav-stepanov-v-nekotoryh-stsenah-bylo-strashno-snimatsya/
