Россия президенэ Владимир Путин Саха сирин баһылыга Айсен Николаев Уһук Илин энергетическэй комплексын салгыы сайыннарыыга этиилэрин өйөөтө. Салаа үлэтин боппуруостара Кремльгэ оробуочай көрсүһүүгэ дьүүллэһилиннилэр.
Айсен Николаев президент сорудаҕынан 2024 сылтан Россия Федерациятын Судаарыстыбаннай Сэбиэтин «Энергетика» хайысхаҕа хамыыһыйатын салайарын бэлиэтээтэ. Кини этэринэн, хамыыһыйа Уһук Илин энергосистиэмэтин сайыннарыы боппуруостарын тиһигин быспакка көрөр, ол иһигэр тарыыбы, электрическэй ситим хаһаайыстыбатын саҥардыы уонна эрэллээх энергиянан хааччыйыыны.
Өрөспүүбүлүкэ баһылыга бүгүн Саха сиригэр икки гигаватт кэриҥэ саҥа генерирующай кыахтары тутуу бырайыактара тэҥҥэ олоххо киирэллэрин тоһоҕолоон бэлиэтээтэ.
«Эһиги быһаарыыгыт көмөтүнэн, Владимир Владимирович, биһиги билигин Саха сиригэр икки гигаватт энергетическэй кыамтаны тэҥҥэ тутабыт, ону чугастааҕы үс сыл устата киллэриэхпит. Историяҕа хаһан да – сэбиэскэй кэмҥэ да, ордук сэбиэскэй кэм кэннинээҕи да — энергетическэй кыамталар маннык ахсааннара тэҥҥэ тутуллубатаҕа», — диэтэ Айсен Николаев.
Билигин региоҥҥа Новоленскай ТЭС, Нерюнгри ГРЭС иккис уочаратын, Саха ГРЭС-2 иккис уочаратын тутуу салҕанан бара турар, ону тэҥэ гидроэнергетиканы сайыннарыыга атын бырайыактар олоххо киирэллэр.
Онуоха Айсен Николаев Президент болҕомтотун Уһук Илин туспа энергосистиэмэтин үлэтин уратыларыгар туһаайда, онно үрдүк тарыыптар оннунан хаалаллар уонна сөптөөх эбии судаарыстыбаннай өйөбүл ирдэнэр.
Владимир Путин бу ньыманы өйөөтө. «Итиннэ төннүөхпүт. Мин Эһиги толкуйгутун кытта сөбүлэһэбин», — диэтэ Россия президенэ.
