Москваттан «Азия оҕолоро» оонньууга кыттар Анастасия Журавлева харбааһыҥҥа алта мэтээли ылла. Итинтэн үһэ «кыһыл көмүс», иккитэ «боруонса» уонна биирэ «үрүҥ көмүс». Кини кыра сылдьан ууттан олус куттанарын туһунан СИА-ҕа кэпсээтэ.
— Настя, эт тоҕо чуолаан харбааһыны таллыҥ?
— Мин кыра эрдэхпинэ, төрөппүттэрим бассейыҥҥа аан бастаан илдьибиттэригэр олус куттаммыппын өйдүүбүн, оттон билигин ууттан арахпаппын. Ордук баттерфляйы сөбүлүүбүн.
— Ханнык стиллэргэ мэтээллэри ыллыҥ?
— Мин уопсайа алта мэтээллээхпин, итинтэн үс «кыһыл көмүс» мэтээли кроль эстафетатыгар ыллым, икки «боруонсаны» баттерфляйга уонна биир «үрүҥ көмүһү» — комбинированнай харбааһыҥҥа.
Харбааччылар бары олус күүстээхтэр, күн аайы тренажердарга дьарыктанабыт.
— Спорт тус олоххор, үөрэххэ мэһэйдээбэт даа?
— Суох, мин спорт оскуолатыгар үөрэнэбин. Күммүт эрчиллииттэн саҕаланар, онтон үөрэнэбит, ол кэнниттэн киэһэҥҥи дьарык. Барыта биир сиргэ буолар.
— Оттон аралдьыйыы?
— Миэн спорду уонна үөрэҕи туохтааҕар да үрдүктүк тутабын.
— Инникитин туох былааннааххын? Харбааһыны хаалларбатыҥ буолуо…
— Оннук! Кэлин тренер буолар ыра санаалаахпын.
— «Азия оҕолоро» туһунан туох санаа үөскээтэ?
— Барытын олус сөбүлээтим: уу чэпчэки, утарсааччылар күүстээхтэр. Урал кыргыттара ордуктар. Эстафетаҕа уустук уонна тэҥ киирсиигэ биһиги хамаандабыт кыайыылааҕынан тахсыбыта. Эдэр спортсменнар бу оонньууларга кытталларыгар сүбэлиэх этим, манна олус интэриэһинэй.
