Бүлүү улууһун Кыһыл Сыырыттан Кэбээйи оройуонун Мастааҕар диэри гаас ситимин үһүс утаҕын тардыыга Ил Дархан Айсен Николаев оруола улаханын «Сахатранснефтегаз» АУо генеральнай дириэктэрэ Алексей Колодезников иһитиннэрдэ. Трасса уһуна 84 км, бу өрөспүүбүлүкэҕэ улахан ситиһии буолар диэтэ кини.
«2020 сыл атырдьах ыйыгар Благовещенскайга Уһук Илини сайыннарыыга мунньаҕы бырабыыталыстыба бэрэссэдээтэлэ Михаил Мишустин ыыппыта. Онно Ил Дархан бу эбийиэк тутуута, Саха сирин киин уонна илин улуустара гааһынан хааччыллалларыгар стратегическай буоларынан, хайаан да түмүктэниэхтээҕин эппитэ. Бырабыыталыстыба салайааччыта этиини өйөөбүтэ.
Госдуума депутата Галина Данчикова уонна өрөспүүбүлүкэ бырабыыталыстыбатын хамаандата Россия бырабыыталыстыбатын таһымыгар улахан үлэни ыыттыбыт. Түмүгэр бу эбийиэк тутуута түмүктэнэригэр федеральнайдааҕы бюджеттан 2,8 млрд солк, регион бюджетыттан 1,3 млрд солк көрүлүннэ. Маны сэргэ «Сахатранснефтегаз» бэйэтин үбүттэн 1,3 млрд солк аныаҕа«, — диэтэ Алексей Колодезников.
