Коронавирустан нэһилиэнньэни харыстыыр сыалтан муниципалитеттар баһылыктара туох баар ирдэнэр миэрэлэри ылыахтаахтар. Ил Дархан Айсен Николаев баһылыктары нэһилиэнньэ кыттыылаах отчуоттары ыытартан туттуналларыгар эттэ. Вакцинацияланыыны уонна хос быһыы ылыыны тэтимирдэллэригэр ыҥырда.
«Билигин сүрүн сорукпут — барытын түргэнник олоххо киллэриэхтээхпит. Ыарыы түргэнник тарҕанарын учуоттаан, чуолкай уонна түргэн быһаарыылары ылыахтаахпыт, суһаллык толоруохтаахпыт», – диэтэ өрөспүүбүлүкэ баһылыга.
Айсен Николаев муниципалитеттар баһылыктара нэһилиэнньэ кыттыылаах миэстэтигэр тиийэн ыытар отчуоттартан туттуналларыгар эттэ. Эпидемиологическай балаһыанньаны тутан олорон, дьаһаллары ыла охсон, вакцинацияны уонна ревакцинацияны тэтимирдэргэ, итини сэргэ ирдэнэр миэрэлэри тутуһууну күүһүрдэргэ сорудахтаата. Мааска эрэсиимэ, дезинфекция, термометрия барыта ирдэнэр.
ФАП-тар ыраах сытар, суола-ииһэ суох нэһилиэнньэлээх пууннары эминэн-томунан хааччыйыахтаахтар, ордук вируһу утары охсуһалларынан.
«Роспотребнадзор» Саха сиринээҕи управлениета иһитиннэрбитинэн, ыарыы эмискэ элбээтэ, омикрон-штамм эмиэ көһүннэ. Саха сирэ ыарыы 100 тыһыынча киһиэхэ тиксиитинэн дойдуга 4 — 5 миэстэҕэ турар. Ыарыы уопсай ахсааныттан 80%-на Дьокуускайга бэлиэтэнэр. Сэрэхтээх соҕус сирдэринэн Мэҥэ Хаҥалас, Алдан, Хаҥалас, Горнай, Мииринэй, Нерюнгри буолаллара быһаарыллыбыт.
Улуус баһылыктара миэстэтигэр эпидбалаһыанньаны тутан олорон, тэрилтэлэр үлэлэрин хонтуруоллуохтаахтар.
Санатар эбит буоллахха, хааччахтыыр миэрэлэр 2022 кулун тутар 1 күнүгэр диэри уһаатылар.
Хаартыска: Андрей Сорокин
