Быйыл Өлүөнэ муостатын тутууга биир улахан тэрээһин — коффердамнары туруоруу ыытыллыа. Айсен Николаев «Якутия, вперед!» биэриигэ муоста тирэхтэрин туруорар ураты технология туһунан кэпсээтэ.
«Муоста тутуутун биир сүрүн түһүмэҕэ — билигин коффердамнары киллэрии буолар. Быйыл биири хайаан да туруоруохпут. Бу хайыы үйэ былаһааккаҕа бэлэмнэммит улахан ыстаал цилиндр. Иһигэр сыбаайалары туруорарга аналлаах тэриллэр бааллар. Коффердам кээмэйэ олус улахан — элбэх мэндиэмэннээх дьиэ саҕа, ыйааһына хас да тыһыынча туонна. Кинини анал сириэстибэлэринэн өрүс сүнньүгэр таһааран, түгэҕэр түһэриэхтэрэ. Онтон иһиттэн ууну оботторон баран, муоста тирэҕин сыбаайаларын туруорууга үлэлиир кыах үөскүүр. Маннык коффердамнар үһүөлэр», — диэн регион баһылыга кэпсээтэ.
Айсен Николаев быһаарбытынан, коффердамнар Саха сирин айылҕатын усулуобуйатыгар үлэ болдьоҕун уһатар кыаҕы биэриэхтэрэ. Иһигэр уу таһымыттан уонна температуратыттан тутулуга суох үлэлиэххэ сөп.
