Кыргыстаантан киирсэр саха бөҕөһө, Азия чөмпүйүөнэ, Олимпийскай оонньуулар кыттыылаахтара Айаал Лазарев сэтинньи 7-8 күннэригэр Москубаҕа ыытыллар норуоттар ардыларынааҕы турнирга кыттыа. Бу туһунан «Спорт Якутии» суруйар.
Күрэхтэһиигэ тоҕус дойду: Арассыыйа, Турция, Кыргыстаан, Румыния, Македония, Аргентина, Узбекистан, Азербайджан уонна Бахрейн тустууктара кытталлар.
Айаал Лазарев 125 кг диэри ыйааһыннаахтарга киирсиэ. Кини күрэххэ бүтэһик бэлэмнэниитин Владикавказка ааспыт.
Санатабыт, Айаал Лазарев көбүөргэ улахан тохтобул кэннэ (2017 сыллаахха Парижка ыытыллыбыт аан дойду чөмпүйэнээтигэр бөҕөс улахан эчэйиини ылбыта) бу сыл саҕаланыыта төннүбүтэ. Тохсунньуга кини Киргизия чөмпүйүөнэ буолбута, олунньуга Азия чөмпүйэнээтигэр Нью-Делига кыттыбыта эрээри мэтээли ылары ситиспэтэгэ.
