Сэбилэниилээх Күүстэр кэккэлэригэр сулууспалыырга улуустан 42 уол ыҥырыллан, кинилэри муус устар 12 күнүгэр үөрүүлээх быһыыга-майгыга атаардылар.
Аармыйаҕа барааччылары улуустааҕы ыччат уонна дьиэ кэргэн управлениетын салайааччыта Константин Захаров, нэһилиэнньэ социальнай көмүскэллээх буолуутун управлениетын начальнига Иван Шестаков, бэтэрээннэр сэбиэттэрин бэрэссэдээтэлэ Маргарита Максимова, үөрэх управлениетын отделын салайааччыта Иннокентий Березкин уолаттар дойдуларын чиэһин түһэн биэрбэккэлэр этэҥҥэ сулууспалаан эргиллэн кэлэллэригэр баҕа санааларын эттилэр.
Улуустааҕы байыаннай комиссариат салайааччыта Аял Петров Ийэ дойду чиэһин көмүскүүргэ доруобуйаларынан, өйдөрүнэн-санааларынан бэлэмнээх, аармыйаҕа барар баҕалаахтар хамыыһыйаны ааһаллар диэн туран уолаттар төрөппүттэригэр чөл доруобуйалаах оҕолору иитэн таһаарбыттарыгар махтанна. Кэнники сылларга ыччаттар доруобуйаларын туруга балачча тупсан иһэр эбит. Ити эдэр дьон ортотугар успуорду өрө тутуу кэҥээбитинэн, медицина күүһүрэн иһэринэн, ону сэргэ бүтүн судаарыстыба үрдүнэн патриоттуу өйү-санааны, иитиини күүһүрдүү ирдэбилэ үрдээбититтэн төрүөттэнэр. Урукку курдук аармыйаттан куотунуу, «саһа» сатааһын көстүүлэрэ суох буолбуттар, оннооҕор доруобуйаларынан сыыйыллыбыттар даҕаны аармыйаҕа бара сатыыр түгэннэрэ үксээбит. Быйыл саас 60 уол Сэбилэниилээх Күүстэр кэккэлэригэр ыҥырыллыахтаах.
«Бэйэбит баҕабытынан, эр киһи буолар аналбытын толороору аармыйалаан эрэбит. Этэҥҥэ сулууспалаан кэлиэхпит, иитии үчүгэй оскуолатын ааһаммыт үөрэхпитин салҕыахпыт, үлэһит буолуохпут», ‒ диэн Араҥас нэһилиэгиттэн сылдьар Василий Максимов уонна Ходороттон Сергей Герасимов харда тылларыгар эттилэр.
