2023 сылга «Тыа сирин кэлимник сайыннарыы» судаарыстыба бырагырааматыгар куонкурсу ааһан Саха сириттэн үс бырайыак киирдэ. Тас көстүүтүн тупсарыыга үбүлээһини Амма уонна Үөһээ Бүлүү оройуоннара ылыахтара, диэн өрөспүүбүлүкэ тыа хаһаайыстыбатын министиэристибэтигэр иһитиннэрдилэр, диэн СИА кэпсиир.
Ол курдук, 2023 с. Амма оройуонугар Михайловка нэһилиэгэр норуот айымньытын дьиэтин тутуутун саҕалыахтара, онтон Алтан нэһилиэгэр култуура дьиэтин тутуохтара.
Үөһээ Бүлүү оройуонун Харыйалаах нэһилиэгэр биэс дьаһал былааннанна: локальнай уу ситимин тардыы, искусственнай бүрүөһүннээх универсальнай спортивнай площадканы тутуу; уулуссаҕа сырдатыыны киллэрии; култуура уонна спорт киинигэр хапытаанай өрөмүөн, фельдшерскэй-акушерскай пуун тутуута.
Бырайыактар уопсай сыаналара 500-тэн тахса мөл. солк. буолуоҕа, итинтэн 400 мөл. солк. федеральнай бүддьүөттэн көрүллүөҕэ. Бу үлэлэр олоххо киирдэхтэринэ, тыа сирин олоҕун хаачыстыбатын тупсарарга көмөлөһүөхтэрэ.
Санатан эттэххэ, быйыл Саха сиригэр «Тыа сирин кэлимник сайыннарыы» бырагырааманан өрөспүүбүлүкэ сэттэ оройуоҥҥа 13 социальнай эбийиэктэри тутуу барар.
