Амма улууһун 2-с Чакыр нэһилиэгэр остуол тенниһигэр үөрэхтээһин бэтэрээнэ, өр кэмҥэ учууталынан үлэлээбит Матвей Матвеев аатынан бэрт сэргэх күрэх буолла.
Матвей Тихонович улахан уола, СӨ Ил Дарханын уонна бырабыыталыстыбатын дьаһалтатыгар судаарыстыбаннай наҕараадаҕа уонна геральдикаҕа салаатыгар үлэлиир Артур Матвеев аҕатын аатын үйэтитэр күрэҕи ыытарга санаатын эппитэ. Онон, бииргэ төрөөбүттэрэ, нэһилиэк олохтоох дьаһалтата уонна оскуола кэлэктиибэ бары көмөлөөн сүүрэн-көтөн, дьону түмэн, сэргэх күрэҕи ыытаннар, нэһилиэк олохтоохторо махталлара муҥура суох. Маннык саҥа саҕалааһыны нэһилиэк иһинэн ыытыы барыларыгар үтүө холобурунан буолла.
Күрэххэ сааһыттан тутулуга суох 43 киһи кытынна. Кинилэргэ сыаналаах бириистэрдээх 8 комплект наҕараада, ону таһынан эр дьоҥҥо уонна дьахталларга абсолютнай кыайыылаахтар бириистэрэ оонньоннулар.
Абсолютнай кыайыылаахтар бириистэрин өрөспүүбүлүкэҕэ биллэр уурбаанньыт, меценат Руслан Федотов туруорда. Ону таһынан сыаналаах бириистэри Матвей Тихонович төрөппүт оҕолоро, кийииттэрэ уонна аймахтара туруордулар.
Тыҥааһыннаах киирсии түмүгүнэн биирдиилээн күрэс кыайыылаахтарынан аҕа саастаах дьахталларга Мария Слепцова, Дария Федорова, Анна Федорова; орто саастаахтарга Анна Павлова, Ольга Романова, Евдокия Ефремова буоллулар. Оскуола оҕолоругар Байаана Антипина кыайыы өрөгөйүн биллэ. Аҕа саастаах эр дьоҥҥо Андрей Попов, Михаил Новиков, Иннокентий Шепелев инники күөҥҥэ таҕыстылар.
Түгэнинэн туһанан, Матвей Тихонович оҕолоро күрэх тэрээһинигэр көхтөөх кыттыыны ылбыт Чакыр нэһилиэгин дьаһалтатыгар (баһылык Прокопий Прокопьев), оскуола кэлэктиибигэр (Семен Шадрин), урбаанньыт Руслан Федотовка, кулууп үлэһиттэригэр уонна аҕаларын бииргэ төрөөбүт быраатын дьиэ кэргэттэригэр Матвеевтарга улахан махталларын эттилэр.
